کراچی میں ہلکی بارش سے موسم خوش گوار

کراچی: شہر قائد میں صبح سے ہی ہلکی بارش کا سلسلہ وقفے وقفے سے جاری ہے، جس سے موسم خوش گوار ہوگیا ہے۔
دوسری جانب مون سون سسٹم کے تحت شہر قائد میں آج اور کل موسلادھار بارشوں کی پیش گوئی کی گئی ہے، جس کے سبب اربن فلڈنگ کا بھی خدشہ ہے۔
ترجمان محکمہ موسمیات انجم نذیر ضیغم کے مطابق ڈیپ ڈپریشن کا مرکز اس وقت سندھ کے ضلع تھرپارکر میں موجود ہے اور آئندہ 18 سے 24 گھنٹوں کے دوران تھوڑا کمزور ہوکر واپس ڈپریشن میں تبدیل ہوگا۔
سسٹم کا رخ سندھ کے وسطی علاقوں میں مغرب اور شمال مغرب کی جانب رہے گا۔
ترجمان کے مطابق آج سے 10 ستمبر تک مون سون سون نظام کے تحت کراچی، شہید بے نظیرآباد، ٹنڈو محمد خان، حیدرآباد، ٹنڈو الٰہ یار، جامشورو، ٹھٹھہ اور بدین میں وقفے وقفے سے بارش کا سلسلہ برقرار رہ سکتا ہے۔
اس دوران کراچی سمیت دیہی سندھ کے مختلف اضلاع میں موسلادھار بارش متوقع ہے اور تیز بارشوں کے نتیجے میں اربن فلڈنگ کی صورت حال پیدا ہونے کے خدشات موجود ہیں۔
سسٹم جب بلوچستان کی جانب منتقل ہوگا تو حب ڈیم میں مسلسل بارش کے سبب پانی کی سطح بڑھے گی جب کہ بارشوں کی وجہ سے دادو کے پہاڑی سلسلے پر طغیانی کی صورت حال پیدا ہونے کا امکان ہے۔
ترجمان کا کہنا تھا کہ سسٹم کے ڈپریشن یا ڈیپ ڈپریشن میں تبدیل ہونے کے سبب کراچی میں 60 سے 70 کلومیٹر فی گھنٹہ کی رفتار سے ہوائیں چلنے کا بھی امکان ہے جب کہ تیز ہواؤں کے ساتھ بارش ہوگی۔
محکمۂ موسمیات نے عوام کو احتیاطی تدابیر اختیار کرنے کی ہدیات کی ہے۔