فلوریڈا: امریکا سے تعلق رکھنے والے لیجنڈ ریسلر ہُلک ہوگن 71 برس کی عمر میں انتقال کرگئے۔
امریکی میڈیا کے مطابق لیجنڈ ریسلر کا انتقال فلوریڈا میں ان کی رہائش گاہ پر دل کا دورہ پڑنے کے باعث ہوا۔
رپورٹ کے مطابق آنجہانی ہلک ہوگن نے گزشتہ ماہ دل کی سرجری کرائی تھی اور حالیہ ہفتوں میں صحت یاب ہورہے تھے۔
کچھ ہفتے قبل ہلک ہوگن کی اہلیہ نے بھی ریسلر کے کوما میں ہونے کی افواہوں کی تردید کی تھی۔
ہلک ہوگن 1953 میں پیدا ہوئے، ان کا شمار 1980 اور 1990 کی دہائی میں ڈبلیو ڈبلیو ای کے سب سے بڑے اسٹارز میں ہوا کرتا تھا۔
ہلک ہوگن کا اصل نام ٹیری جین بولیا (Terry Gene Bollea) تھا تاہم وہ ہلک ہوگن کے نام سے مشہور تھے ۔
انہوں نے کیریئر میں متعدد چیمپئن شپ ٹائٹلز اپنے نام کیے، 2005 میں ہلک ہوگن کو پہلی بار WWE ہال آف فیم میں شامل کیا گیا تھا۔
ہلک ہوگن نہ صرف ریسلنگ رِنگ بلکہ فلموں اور ٹی وی شوز میں بھی مشہور رہے۔
ان کی موت پر ریسلنگ انڈسٹری اور دنیا بھر میں ان کے چاہنے والے گہرے دکھ اور افسوس کا اظہار کررہے ہیں۔