ایٹمی قوت دفاع کی ضمانت، مودی کو خواب میں بھی پاک فوج نظر آتی ہے: خواجہ آصف

اسلام آباد: وزیر دفاع خواجہ محمد آصف کا کہنا ہے کہ پاکستان نہ ہی نیوکلیئربلیک میلنگ کررہا ہے اور نہ اس پریقین رکھتا ہے، پاکستان کے جوہری اثاثے صرف ملکی دفاع کے لیے ہیں۔
خواجہ آصف نے نجی ٹی وی سے گفتگو کرتے ہوئے کہا کہ ہم کسی کوبلیک میل نہیں کرتے، نیوکلیئر صلاحیت ہمارے دفاع کی ضمانت ہے، نریندر مودی کو اب خواب میں بھی پاکستان اور پاکستانی افواج نظر آتی ہیں، مودی کے لیے پاکستان سے جنگ ایک ڈراؤنا خواب بن چکا ہے، وہ بنیادی طور پر اپنے ووٹرز کو مطمئن کررہے ہیں۔
وزیر دفاع کا کہنا تھا کہ پاکستان نے اپنے دفاع میں جنگ لڑی اور جنگ جیتی، نریندر مودی کے لیے دوسری جنگ بھارت کے اندر نظر آرہی ہے، بھارت کے اندر سے نریندر مودی کے خلاف آوازیں اٹھ رہی ہیں، بھارتی شہری خود کہہ رہے ہیں کہ مودی کا رویہ ایسا تھا کہ جنگ تک نوبت آگئی، مودی پر کانگریس سمیت چھوٹی ریاستوں میں بھی شہری اب تنقید کررہے ہیں۔
انہوں نے کہا کہ نریندر مودی ایسے بیانات دے کر اپنے گھر میں اٹھنے والے طوفان کو روکنے کی کوشش کررہا ہے، مودی جانے ان کے اپنے گھر کے سیاسی افراد جانیں، پاکستان کا اس سے کوئی تعلق نہیں، آج سے سال یا ڈیڑھ سال قبل بھارت کا سیاسی و معاشی طورپر کچھ مقام تھا، مودی کے ہاتھوں بھارت اپنا مقام کھوبیٹھا ہے۔
خواجہ آصف نے کہا کہ بھارت میں نریندر مودی کی ناکامی ان کی اپوزیشن کے لیے ایک موقع ہے، بھارتی اپوزیشن نریندر مودی کی ناکامیوں کے مواقع سے فائدہ اٹھا رہی ہے، بھارت نے جس طرح دہشت گردی کی پشت پناہی کی بین الاقوامی سطح پربھی اسے ناکامی ہوئی۔
وزیر دفاع کا کہنا تھا کہ کینیڈا اورپاکستان میں دہشت گردی کے واقعات نریندر مودی نے کرائے، نریندر مودی کے چہرے پر دہشت گردی کا دھبہ لگ چکا ہے، پاکستان میں بی ایل اے اور طالبان بھارت کی پراکسیز ہیں، پاکستان کےپاس بھارتی دہشتگردی کے واضح ثبوت موجود ہیں جو ہم نے عالمی فورم پر بھی جمع کرائے ہیں۔
انہوں نے کہا کہ اگر اچھے ہمسایوں کی طرح رہا جائے تو برصغیر میں امن ممکن ہے، برصغیر کے عوام معاشی ترقی بھی کر سکتے ہیں۔