خلیل قمر نے بدتمیزی کی، اپنی عزت کی خاطر خاموش رہی: ریشم

لاہور: اداکارہ ریشم نے ڈرامہ نویس اور شاعر خلیل الرحمٰن قمر پر بدتمیزی کرنے کا سنگین الزام عائد کیا ہے۔ ریشم نے یہ انکشاف اپنے ایک حالیہ انٹرویو کے دوران کیا۔
ریشم نے انٹرویو میں خلیل الرحمٰن قمر کے ساتھ اپنے ایک تلخ تجربے کو شیئر کیا۔ انہوں نے بتایا کہ کس طرح قمر نے ان کے ساتھ بدتمیزی کی اور انہیں نظرانداز کیا۔
ریشم نے اپنی تعلیمی قابلیت پر بھی بات کی۔ انہوں نے کہا، میں میٹرک پاس ہوں، لیکن آج اگر میں کہوں کہ میں نے اردو میں گریجویشن کی ہے، تو لوگ یقین کرلیں گے۔
ریشم نے بتایا کہ انہوں نے فلمی سیٹ پر اپنے بڑوں سے اردو کے الفاظ سیکھے ہیں، اور انہیں اس پر فخر ہے۔ ان کا کہنا تھا، میں ہمیشہ عاجزی کے ساتھ چلتی ہوں، کیونکہ اللہ کو عاجزی پسند ہے۔
انہوں نے بتایا، جب خلیل الرحمٰن قمر کا ڈراما ’’میرے پاس تم ہو‘‘ آن ایئر ہوا، تو میں نے ہمایوں سعید کو اپنے گھر مدعو کیا۔ بعد میں، میں ہمایوں کے ساتھ ایک تقریب میں گئی، جہاں خلیل الرحمٰن قمر بھی موجود تھے۔ میں نے انہیں دیکھ کر سلام کیا، لیکن انہوں نے سلام کا جواب دینے کے بجائے مجھ سے بدتمیزی کرتے ہوئے کہا، دور ہوجاؤ، میں تم سے بات بھی نہیں کرنا چاہتا۔
ریشم نے کہا کہ میں خلیل قمر کو اس کا جواب دے سکتی تھی، لیکن میں نے اپنی عزت کی خاطر خاموشی اختیار کی۔ ان کا کہنا تھا، مجھے اینٹ کا جواب پتھر سے نہیں، اینٹ سے دینا آتا ہے، لیکن میں نے اسکینڈل سے بچنے کے لیے خاموشی اختیار کی۔
یہ پہلی بار نہیں ہے جب ریشم نے خلیل الرحمٰن قمر پر تنقید کی ہے۔ ماضی میں بھی انہوں نے خلیل قمر کو ماہرہ خان اور نعمان اعجاز کے خلاف دیے گئے متنازع بیانات پر تنقید کا نشانہ بناتے ہوئے کہا تھا کہ انہیں اپنی صحت پر توجہ دینی چاہیے۔