کیا شان مسعود سے قومی ٹیسٹ ٹیم کی قیادت چھننے والی ہے؟

لاہور: پاکستان کی ٹیسٹ کرکٹ ٹیم کی مسلسل ناقص کارکردگی پر کپتان شان مسعود کو قیادت سے ہٹائے جانے کا امکان ہے۔
میڈیا رپورٹس میں دعویٰ کیا جارہا ہے قومی ٹیسٹ ٹیم کے موجودہ نائب کپتان سعود شکیل کو کپتانی سونپی جاسکتی ہے، جس کا اعلان پاکستان کرکٹ بورڈ (پی سی بی) جلد کردے گا۔
رپورٹس میں کہا گیا ہے کہ قیادت میں تبدیلی کا فیصلہ قریباً حتمی شکل اختیار کرچکا ہے۔
قیادت میں تبدیلی اِیسے وقت میں سامنے آئی ہے جب گزشتہ روز خبر سامنے آئی تھی کہ مصباح الحق کو ٹیسٹ ٹیم کا نیا ہیڈکوچ بنایا جارہا ہے، تاہم بورڈ نے تاحال تصدیق نہیں کی۔
شان مسعود کو نومبر 2023 میں ٹیسٹ ٹیم کا کپتان مقرر کیا گیا تھا تاہم انکی قیادت میں خاطر خواہ نتائج حاصل نہیں ہوسکے، البتہ ہوم گراؤنڈ پر پہلی بار بنگلادیش کے خلاف بدترین شکست کا منہ دیکھنا پڑا۔
اِن کی کپتانی میں پاکستان نے 12 ٹیسٹ میچ کھیلے، جن میں سے صرف 3 جیتے اور 9 میں شکستوں کا سامنا کرنا پڑا۔
اسی طرح ورلڈ ٹیسٹ چیمپئن شپ سائیکل 2023-25 میں پاکستان کا سفر انتہائی مایوس کن رہا اور 9ویں پوزیشن حاصل کی۔
شان کی مسلسل ناقص پرفارمنس اور غیر مؤثر حکمت عملی نے سلیکٹرز اور ٹیم مینجمنٹ میں تشویش پیدا کردی تھی۔