تہران/ تل ابیب: ایران نے چوتھی بار اسرائیل کے دارالحکومت تل ابیب اور حیفہ شہر پر بیلسٹک میزائل و ڈرون داغ دیے، جس کے بعد اسرائیل میں سائرن بج اٹھے ہیں۔
ایرانی میڈیا کے مطابق حیفہ کے رمات ڈیوٹ ایئربیس کو نشانہ بنایا گیا ہے جب کہ اسرائیل نے بھی تہران پر تازہ حملہ کیا ہے۔ ایرانی حملے کے بعد اسرائیل میں حیفہ ریفائنری کو مکمل بند کردیا گیا جب کہ حملے میں 3 ملازمین ہلاک ہوئے ہیں۔
پاسداران انقلاب کے ترجمان جنرل علی محمد نے کہا کہ آپریشن وعدہ صادق سوم کی یہ 9ویں لہر ہے جو صبح تک جاری رہے گی۔ ہم دشمن کو ایک لمحہ کے لیے بھی امن میسر نہیں ہونے دیں گے۔
ایرانی سیکیورٹی کونسل نے اس سے قبل بیان دیا تھا کہ آج چوتھا دن انتہائی خطرناک ہوگا اور اسرائیل کو رات کے وقت دن کا منظر دکھائی دے گا۔
قبل ازیں اسرائیلی وزیراعظم نیتن یاہو نے تہران کے عوام اور ایران نے تل ابیب کے شہریوں کو فوری انخلا کی ہدایت کرتے ہوئے بڑے حملوں کا اعلان کیا ہے۔
گزشتہ روز ایران نے صبح سویرے اسرائیل پر دوسرا بڑا حملہ کرتے ہوئے درجنوں بیلسٹک میزائل داغ دیے جس کے نتیجے میں کئی عمارتیں کھنڈر بن گئیں جبکہ 8 اسرائیلی ہلاک اور 300 زخمی ہوئے۔ تارہ حملے میں حیفہ پاور پلانٹ کو نشانہ بنایا گیا جس میں ایرانی میزائل حملوں کے نتیجے میں آگ لگ گئی تھی۔