بھارتی رافیل طیارے پاکستان ایئرفورس کے خوف سے بوکھلاہٹ میں واپس فرار

اسلام آباد: بھارتی رافیل طیارے پاکستان ایئرفورس کے خوف سے بوکھلاہٹ کا شکار ہوکر واپس فرار ہونے پر مجبور ہوگئے۔
سیکیورٹی ذرائع کے مطابق 29 اور 30 اپریل کی شب بھارتی ایئرفورس کے 4 رافیل طیاروں نے بھارتی جغرافیائی حدود میں رہتے ہوئے مقبوضہ جموں کشمیر میں پٹرولنگ کی۔
اس موقع پر پاکستان ایئرفورس کے طیاروں نے بھارتی ایئرفورس کے ان جنگی جہازوں کی فوراً نشان دہی کرلی، جس کے بعد پاکستانی ایئرفورس کی بروقت اور مستعد کارروائی پر انڈین رافیل طیارے بوکھلاہٹ کا شکار ہوکر راہ فرار اختیار کرگئے۔
سیکیورٹی ذرائع کا کہنا ہے کہ پاکستانی افواج بھارت کی طرف سے کسی بھی جارحیت کا منہ توڑ جواب دینے کے لیے ہمہ وقت تیار اور مستعد ہیں۔
پہلگام فالس فلیگ کے بعد بھارت پر سوار جنگی جنون کا پاکستانی مسلح افواج اور عوام کی جانب سے دندان شکن جواب دیا جارہا ہے۔
ذرائع کے مطابق لائن آف کنٹرول مقبوضہ کشمیر کے اطراف میں بھارتی فوج کی غیر معمولی نقل و حرکت کی جارہی ہے۔ مقبوضہ کشمیر میں لائن آف کنٹرول سے متصل تمام سرحدی گاؤں خالی کروالیے گئے ہیں۔
علاوہ ازیں مودی سرکار کی جانب سے پہلگام فالس فلیگ کو بنیاد بنا کر کشمیری مسلمانوں کیخلاف بڑے پیمانےپر کریک ڈاؤن بھی جاری ہے۔ اس دوران مقبوضہ کشمیر کے مسلمانوں کی زندگی کو مودی اور بھارتی فوج نے اجیرن بنا دیا ہے۔ مودی سرکار پراس وقت جنگی جنون سوار ہے جو خطے کا امن تباہ کرنے پر تلا ہوا ہے۔
مستند انٹیلی جنس اطلاعات کے مطابق جنگی جنون میں مبتلا بھارت، پاکستان کےخلاف کسی بھی وقت فوجی کارروائی کرسکتا ہے جب کہ بھارت کی کسی مہم جوئی کا یقینی اور سخت جواب دینے کے لیے مسلح افواج مکمل تیار ہیں۔
ذرائع کے مطابق پاکستانی عوام مسلح افواج کے شانہ بشانہ بھارت کو دندان شکن جواب دینے کے لیے تیار ہیں۔ پاکستانی قوم مسلح افواج کے ساتھ مل کر اپنی خودمختاری اور علاقائی سالمیت کا ہرقیمت پر دفاع کرے گی۔
سیاچن سے لے کر بحیرہ عرب کے پانیوں تک پاکستان کی مسلح افواج دفاع وطن کے لیے مکمل تیار ہیں۔ کسی بھی بھارتی جارحیت کی صورت میں دشمن کو دندان شکن جواب دیا جائے گا۔
ذرائع کے مطابق دشمن کی کسی بھی مذموم کارروائی سے نمٹنے کے لیے افواج پاکستان مکمل تیار ہیں۔ بھارت نے پاکستان کی علاقائی سالمیت کو چیلنج کیا تو بھارت کو اُسی کی زبان میں جواب دیا جائے گا۔
ذرائع کا کہنا ہے کہ ہمارے جدید جنگی سازوسامان جس میں جہاز، ٹینک اور گرجتی آرٹلری شامل ہے، دشمن کو خاموش کرانے کی بھرپور صلاحیت رکھتے ہیں۔ پاکستانی مسلح افواج چھوٹے بڑے تمام جدید جنگی ہتھیاروں کے ساتھ مکمل تیار ہیں۔
دریں اثنا دفاعی ماہرین کا کہنا ہے کہ جب بات مادر وطن کے دفاع کی ہو تو پاکستانی قوم اور مسلح افواج دشمن کے سامنے سیسہ پلائی دیوار ہیں۔