نازیبا ویڈیوز جعلی، مجھے بدنام کرنے کیلئے وائرل کی گئیں، امشاء رحمان

کراچی: معروف ٹک ٹاکر امشا رحمان نے گزشتہ برس خود سے متعلق نازیبا ویڈیوز لیک ہونے کے معاملے پر بالآخر خاموشی توڑ دی۔
امشا رحمان نے نازیبا ویڈیوز اسکینڈل کے کئی ماہ بعد بالآخر اس واقعے سے متعلق بڑا بیان دیا ہے۔
امشا رحمان نامور سوشل میڈیا اسٹار اور ٹک ٹاکر ہیں، گزشتہ سال کچھ نجی ویڈیوز وائرل ہوئی تھیں۔ اس اسکینڈل کے بعد امشا نے اپنا اکاؤنٹ ختم کردیا تھا۔
ان نازیبا ویڈیو سے متعلق امشا رحمان نے حال ہی میں اپنا موقف بیان کیا ہے۔
امشا رحمان کا کہنا ہے کہ ان سے منسوب یہ نازیبا ویڈیوز جعلی ہیں جو انہیں بدنام کرنے کے لیے وائرل کی گئی تھیں۔
ٹک ٹاکر نے ویڈیو اسکینڈل پر خاموشی توڑتے ہوئے مداحوں کو اس کے نیتجے میں پیش آنے والی مشکلات سے بھی آگاہ کردیا۔
انہوں نے کہا کہ میں نے انٹرنیٹ پر یہ ویڈیوز دیکھیں جنہوں نے میری پوری زندگی تباہ کردی، میں یونیورسٹی نہیں جاسکتی، میں لوگوں کا سامنا نہیں کرسکتی، مجھے جان سے مارنے کی دھمکیاں بھی دی گئیں۔
امشا نے مزید کہا کہ سوشل میڈیا پر لوگوں کو لگتا ہے کہ دوسروں کی ویڈیوز بناکر پھیلانا بہت اچھا ہے، لیکن وہ یہ بھول جاتے ہیں کہ دوسرے شخص کی زندگی پر اس کے کیا اثرات پڑسکتے ہیں۔
اُن کا کہنا تھا کہ میں اپنے اکاؤنٹ پر ویڈیو پوسٹ کرکے اِس اسکینڈل کا جواب دے سکتی تھی، لیکن میں نے ان کے خلاف قانونی کارروائی کا فیصلہ کیا۔ ہمارا قومی ادارہ ایف آئی اے بہت باصلاحیت ہے، وہ (ویڈیوز بناکر وائرل کرنے والے) مجرم کو گرفتار کرچکے اور اب وہ ان کی حراست میں ہے۔
خیال رہے کہ امشا رحمان اپنا اکاؤنٹ معطل کرنے سے پہلے ٹک ٹاک پر قریباً 2 لاکھ سے زائد فالوورز حاصل کرچکی تھیں۔