اسلام آباد: پی ٹی آئی کے بانی عمران خان نے آرمی چیف جنرل عاصم منیر کو تیسرا خط لکھ دیا۔
اڈیالہ جیل کے باہر میڈیا سے گفتگو میں وکیل فیصل چوہدری کا کہنا تھا کہ عمران خان نے آج آرمی چیف کو تیسرا خط لکھا ہے، جس میں الیکشن فراڈ کے ذریعے اقلیت کو اکثریت پر ترجیح دینے کا معاملہ اٹھایا ہے۔
انہوں نے کہا کہ بانی پی ٹی آئی نے خط میں کہا، منی لانڈرز کو اقتدار میں بٹھایا گیا ہے۔
ان کا کہنا تھا کہ بانی پی ٹی آئی کے تیسرے خط کے مندرجات آج سامنے آئیں گے۔
فیصل چوہدری کا کہنا تھا کہ 9 مئی کے واقعے پر آج بھی جوڈیشل کمیشن کے قیام کے مطالبے پر قائم ہیں، 8 فروری کے بعد پنجاب میں چھاپوں کا سلسلہ تاحال جاری ہے۔
انہوں نے کہا کہ عامر ڈوگر کو اپوزیشن کے ساتھ مذاکراتی کمیٹی کا رکن بنایا گیا ہے، سیاسی کمیٹی میں کچھ نئے ارکان کے اضافے کا فیصلہ کیا گیا ہے، انتظار پنجوتھا کو آج جیل میں نہیں جانے دیا گیا، وکلا کو جیل ٹرائل میں نہیں جانے دیا جارہا، ہم جی ایچ کیو کیس میں بھی اوپن ٹرائل کی درخواست دائر کریں گے۔
دھیان رہے کہ گزشتہ دنوں سابق وزیراعظم عمران خان نے آرمی چیف جنرل عاصم منیر کو خط لکھے تھے، جن میں پالیسیاں تبدیل کرنے کی درخواست کی گئی تھی۔
اس پر سیکیورٹی ذرائع نے کہا تھا کہ آرمی چیف کو عمران خان کا کوئی خط موصول نہیں ہوا، ایسے کسی خط کو پڑھنے میں کوئی دلچسپی نہیں۔