کراچی: خوبرو اداکارہ نازش جہانگیر نے مداح کے سوال پر ایسا صاف اور غیر روایتی جواب دیا، جس نے بابر اعظم کے چاہنے والوں سمیت سوشل میڈیا صارفین کو حیران کردیا۔
نازش جہانگیر، جو ڈرامہ انڈسٹری میں اپنی اداکاری، منفرد کرداروں اور مینٹل ہیلتھ آگاہی کے حوالے سے نمایاں پہچان رکھتی ہیں، آج کل پھر خبروں میں ہیں۔ انہوں نے 2017 میں ڈرامہ بھروسا سے کیریئر کا آغاز کیا اور پھر متعدد مشہور پروجیکٹس میں نظر آئیں۔ 2022 میں سمیع خان کے ساتھ فلم لفنگے سے فلمی ڈیبیو کیا جب کہ 2024 میں خوشحال خان کے ساتھ پپے کی ویڈنگ میں جلوہ گر ہوئیں۔ انہیں لکس اسٹائل ایوارڈز میں بیسٹ ایمَرجنگ ٹیلنٹ کے لیے نامزدگی بھی مل چکی ہے۔
انسٹاگرام پر ایک غیر رسمی سوال جواب سیشن کے دوران ایک صارف نے اُن سے سوال کیا کہ اگر قومی کرکٹ ٹیم کے اسٹار بیٹر بابر اعظم انہیں شادی کی پیشکش کریں تو وہ کیا جواب دیں گی؟
نازش نے اس سوال پر کوئی لگی لپٹی رکھے بغیر سیدھا سا جواب دیا: ’’میں معذرت ہی کروں گی‘‘۔
نازش کا یہ دوٹوک ردِعمل چند ہی لمحوں میں سوشل میڈیا پر زیرِبحث آ گیا۔ کچھ صارفین نے ان کی خوداعتمادی اور سادگی کو سراہا تو بعض نے اس صورت حال کو خوش گوار اور مزاحیہ قرار دیا۔