بیٹی صاحبہ سے 8 ماہ سے نہیں ملی، اداکارہ نشو دوران پروگرام روپڑیں

لاہور: فلموں کی سینئر اداکارہ نشو بیگم نے انکشاف کیا ہے کہ وہ گزشتہ 8 ماہ سے اپنی بیٹی اداکارہ صاحبہ سے نہیں ملی ہیں۔
حال ہی میں ایک نجی ٹی وی شو میں ماضی کی مقبول اداکارہ نشو بطور مہمان شرکت کی، پروگرام میں نشو بیگم سے پوچھا گیا کہ کیا وہ ماضی کے کسی فیصلے پر نادم ہیں؟ اس پر انہوں نے اعتراف کیا کہ زندگی میں کیے گئے کچھ فیصلے ان کے لیے پچھتاوے کا باعث بنے، جن میں ان کی پہلی شادی شامل ہے۔
نشو نے بتایا کہ ان کی پہلی شادی نے ان سے ان کا سب کچھ چھین لیا، جیسے گاڑی، زیور اور ان کا پیشہ۔ اداکارہ نے جذباتی ہوتے ہوئے کہا کہ اُس وقت جب وہ حاملہ تھیں، اپنی بچی کو بچانے میں کامیاب رہیں لیکن موجودہ حالات نے انہیں بہت زیادہ دکھ دیا ہے۔
نشو بیگم نے روتے ہوئے مزید کہا کہ انہیں اپنی بیٹی صاحبہ کو دیکھے ہوئے 8 مہینے ہوگئے ہیں اور اس دوری کی وجہ صاحبہ کے والد ہیں۔ تاہم انہوں نے کہا کہ وہ اس صورت حال کو قبول کرچکی ہیں۔ نشو نے یہ بھی کہا کہ خاندانی معاملات کو عوام کے سامنے لانا مناسب نہیں، لیکن جب بات منظرعام پر آہی گئی ہے تو انہوں نے سوشل میڈیا پر اپنے جذبات کا اظہار کردیا۔
خیال رہے کہ کچھ عرصہ قبل صاحبہ کی اپنے حقیقی والد سے پہلی بار ملاقات ہوئی تھی، لیکن اس ملاقات کے بعد ان کے اپنی والدہ نشو بیگم کے ساتھ تعلقات خراب ہوگئے تھے۔