امیر گیلانی کے سوا کسی اور سے شادی کا سوچ بھی نہیں سکتی تھی، ماورا

کراچی: ٹی وی کی مقبول اداکارہ اور ماڈل ماورا حسین نے اعتراف کیا ہے کہ پہلے انہیں امیر گیلانی سے محبت ہوئی۔
ماورا حسین نے حال ہی میں ایک انٹرویو میں بتایا کہ میں نے سب سے پہلے امیر گیلانی کی معصومیت اور خوبصورتی کو محسوس کیا، بعدازاں جب میں نے ان کی شخصیت کو قریب سے جانا تو یہ بات سامنے آئی کہ وہ نہایت نرم مزاج، مہذب اور ہر معاملے میں ساتھ دینے والے انسان ہیں، یہی خوبیاں میرے دل میں گھر کر گئیں اور میں نے اللہ سے دعا کی کہ امیر ہی میرے شریکِ حیات ہوں۔
ماورا نے بتایا کہ اگرچہ امیر گیلانی بھی مجھے پسند کرتے تھے، لیکن دونوں میں سے کسی نے بھی کبھی اپنے جذبات کا براہِ راست اظہار نہیں کیا، اس محبت کی کہانی میں اہم کردار امیر گیلانی کی والدہ نے ادا کیا، جنہوں نے دونوں خاندانوں کو قریب لانے میں مدد دی۔
ماورا نے یہ بھی انکشاف کیا کہ جو پہلی انگوٹھی میں نے پہنی، وہ میری ساس نے خود میری انگلی میں پہنائی تھی۔
اداکارہ نے دوران انٹرویو مزید کہا کہ اگر امیر گیلانی نہ ہوتے تو میں کسی اور سے شادی کا سوچ بھی نہیں سکتی تھی، ڈرامہ سیریل ثبات کے سیٹ پر امیر کو نماز پڑھتے دیکھ کر مجھے یقین ہوگیا تھا کہ یہی وہ شخص ہیں جس کے ساتھ میں اپنی زندگی گزارنا چاہتی ہوں۔
ماورا حسین کا کہنا تھا کہ میں اپنی ازدواجی زندگی سے بے حد خوش ہوں اور ہم دونوں ایک دوسرے سے بے پناہ محبت کرتے ہیں۔