کراچی میں کل شدید موسلادھار بارش سے اربن فلڈنگ کا اندیشہ

کراچی: محکمۂ موسمیات نے شہر میں کل شدید موسلا دھار بارش کی پیش گوئی کرتے ہوئے اربن فلڈنگ کا خدشہ ظاہر کیا ہے۔
ترجمان محکمۂ موسمیات انجم نذیر کے مطابق کراچی میں مون سون سسٹم ڈیپ ڈپریشن کی شدت کے ساتھ برقرار ہے، ڈیپ ڈپریشن سمندری طوفان بننے سے پہلے کی ایک اسٹیج ہے۔
ترجمان کے مطابق بارش کا سسٹم زمین پر موجود ہے اوراس کا مرکز تھرپارکر میں ہے، اتنی شدت کے سسٹم میں 60 سے 70 کلومیٹر فی گھنٹہ کی رفتار سے ہوائیں چل سکتی ہیں۔
انجم نذیر کا کہنا ہے کہ مون سون کا یہ سسٹم شدید موسلا دھار بارش کا سبب بنتا ہے، سہ پہر میں کراچی میں موسلادھار بارش ہوسکتی ہے، کل یہ سسٹم شہر کے قریب سے گزرے گا، کل کراچی کی صورت حال خراب رہ سکتی ہے۔
ترجمان نے مزید بتایا کہ کل کراچی میں شدید موسلا دھار بارش ہوسکتی ہے، شہر میں انفرا اسٹرکچر خراب ہونے کے باعث سڑکوں پر اربن فلڈنگ کا خدشہ ہے، نشیبی علاقوں میں پانی جمع ہوسکتا ہے، شہری کچے انفرا اسٹرکچر سے دور رہیں، تیز بارش کی صورت میں گھروں میں رہیں۔
انہوں نے بتایا کہ پورے اسپیل کے دوران کراچی میں 100 ملی میٹر سے زائد بارش ہوسکتی ہے۔