کراچی: آنجہانی بولی وُڈ اداکار سوشانت سنگھ راجپوت کی زندگی پر بننے والی فلم میں مرکزی کردار کے لیے پاکستانی اداکار حسن خان کا انتخاب کیا گیا ہے۔
سوشانت نے کچھ ماہ قبل اپنی زندگی کا خاتمہ کرلیا تھا۔ ان کی موت کی تحقیقات تو جاری ہے تاہم اب تک خودکشی کرنے کی کوئی وجہ سامنے نہ آسکی ہے۔
سوشانت سنگھ نے اپنے کیریئر کو انتھک محنت سے پروان چڑھایا، انہوں نے فلموں میں چھوٹے کرداروں سے ابتدا کی جس کے بعد وہ کامیابی کا سفر طے کرتے ہوئے مرکزی کرداروں میں نظر آنے لگے۔
اداکار کی کامیابی کے اس دشوار گزار سفر کو دکھانے کے لئے ایمازون ویب سیریز بنائی جارہی ہے۔ جس میں سوشانت سنگھ کا کردار ادا کرنے کے لیے پاکستانی اداکار حسن خان کا انتخاب کیا گیا ہے، جو سوشانت کی زندگی پر مبنی فلم میں مرکزی کردار ادا کریں گے۔
پاکستانی ایکٹر حسن خان نے بھی سماجی رابطے کی ویب سائٹ فیس بک پر اپنی اور سوشانت سنگھ کی تصویر شیئر کی جس میں دونوں اداکار ایک جیسا پوز دیتے نظر آرہے ہیں۔ ساتھ ہی انہوں نے تصدیق کرتے ہوئے کہا کہ الحمدللہ مجھے وہ پروجیکٹ مل گیا جو میرے دل کے انتہائی قریب ہے کیوں کہ میں اس میں سوشانت سنگھ کا کردار ادا کروں گا۔