کراچی: سوشل میڈیا پر پاوری گرل کے نام سے معروف، اداکارہ دنانیر مبین اور احد رضا میر کے نئے ڈرامے م سے محبت کے سیٹ سے ویڈیو سوشل میڈیا پر وائرل ہورہی ہے۔
اپنے مشہور ڈائیلاگ پاوری ہورہی ہے سے شہرت کی بلندیوں پر پہنچنے والی دنانیر نے حال ہی میں اپنی گریجویشن مکمل کی ہے، دنانیر کی گریجویشن کی خوشی میں ساتھی اداکاروں نے انہیں مزاحیہ انداز میں سرپرائز دیا، جس پر دنانیر قہقہے لگاتی نظر آئیں۔
دنانیر کو ان کے ساتھی اداکار احد رضا میر اور ان کے والد، معروف اداکار آصف رضا میر نے تحفے دیے۔ احد رضا میر نے دنانیر کو مبارک باد دینے کے لیے نوٹوں کا ہار پہنایا جب کہ آصف رضا میر نے مٹھائی کا تحفہ پیش کیا اور انہیں گریجویشن کی مبارک باد دی۔
دنانیر سینئر اداکاروں کی جانب سے ملنے والی اس مزاحیہ انداز کی مبارک باد پر نہایت خوش اور پرجوش دکھائی دیں۔ سوشل میڈیا پر وائرل ہونے والی اس ویڈیو کو دیکھ کر صارفین پہلے تو حیرت میں مبتلا ہوئے اور سمجھے کے احد اور دنانیر کا رشتہ طے ہونے کے باعث انہیں ہار اور مٹھائی پیش کی جارہی ہے، تاہم بعد میں انہیں ویڈیو کی حقیقت معلوم ہوئی۔
خیال رہے کہ ڈرامہ میم سے محبت میں دنانیر اور احد رضا میر کی جوڑی کو ناظرین بے حد پسند کررہے ہیں جو سوشل میڈیا کی بھی زینت بنا ہوا ہے۔