کراچی: شوبز سے دُوری اختیار کرنے والے معروف اداکار حمزہ علی عباسی پھر سے دو پروجیکٹس پر کام کررہے ہیں۔
اداکار حمزہ علی عباسی نے ایک برس قبل شوبز سے کنارہ کشی اختیار کرکے اپنا وقت دین کی تبلیغ و ترویج میں وقف کرنے کا اعلان کیا تھا اور اس کے بعد ان کی ایک ویڈیو بھی وائرل ہوئی تھی جس میں انہوں نے دہریت سے اسلام تک کے اپنے سفر کو مبلغانہ انداز میں بیان کیا تھا۔
حمزہ علی عباسی کی شادی گزشتہ برس اداکارہ نیمل خاور سے ہوئی تھی اور دونوں کا ایک خوبصورت بیٹا بھی ہے۔ شادی کے بعد جہاں حمزہ علی عباسی نے اداکاری کو خیرباد کہہ دیا تھا، وہیں نیمل خاور نے سارا وقت گھر کو دینے کے ارادے سے مداحوں کو آگاہ کیا تھا۔
حمزہ علی عباسی ایک نجی انٹرٹینمنٹ چینل کے ورچوئل پروگرام میں مہمان بنے، جس میں انہوں نے انکشاف کیا کہ ایک سال کے وقفے کے بعد وہ دوبارہ اسکرین پر نظر آئیں گے۔
حمزہ علی عباسی نے میزبان احمد علی بٹ کے سوال کے جواب میں بتایا کہ میں نے کلی طور پر اداکاری نہیں چھوڑی، ہاں ایک سال کا وقفہ لیا ہے اور اس سلسلے میں میں دو پروجیکٹس پر کام بھی کررہا ہوں۔
واضح رہے کہ اداکار ہمایوں سعید نے گزشتہ برس دسمبر میں انکشاف کیا تھا کہ حمزہ علی عباسی نے اسکالر بننے کے لیے شوبز کی دنیا کو خیرباد کہا ہے کہ جس کے بعد وہ دوبارہ آئیں گے لیکن ان کے کام کی نوعیت حب الوطنی اور روحانیت پر مبنی ہوگی۔