کراچی: وزیراعلیٰ سندھ سید مراد علی شاہ نے اعلان کیا ہے کہ سانحہ گل پلازہ میں جاں بحق ہونے والوں کے لواحقین کو ایک ایک کروڑ روپے دیے جائیں گے۔
ترجمان کے مطابق وزیراعلیٰ سندھ مراد علی شاہ کی زیر صدارت اجلاس ہوا، جس میں صوبائی وزراء شرجیل میمن، ناصر حسین، سعید غنی، میئر اور دیگر شریک ہوئے۔
وزیراعلیٰ سندھ سید مراد علی شاہ نے کہا کہ سانحۂ گل پلازہ میں جاں بحق افراد کے ورثا میں امداد کی فراہمی کل سے شروع ہوجائے گی۔
مُراد علی شاہ نے کہا کہ گل پلازہ میں آگ لگنے پر شدید دُکھ ہے، جانی نُقصان کا مطلب ہے کہ کئی خاندان متاثر ہوئے ہیں، تمام متاثرین چلتے ہوئے کاروبار سے بے روزگار ہوگئے، میں چاہتا ہوں تمام متاثرین کی بحالی کے لیے اقدامات کروں۔
مُراد علی شاہ نے کہا کہ صدر آصف علی زرداری اور چیئرمین بلاول بھٹو کا بار بار فون آرہا ہے، پیپلز پارٹی قیادت چاہتی ہے کہ گل پلازہ کے تاجروں کو فوری بحال کیا جائے، پلازہ کے تمام متاثرین کو بحال کریں گے۔
وزیراَعلیٰ سِندھ نے کہا، کس طرح تمام متاثرین کی بحالی ہو، اس کا فیصلہ کرنا ہے، بتایا جارہا ہے کہ گُل پلازہ میں 1200 دکانیں ہیں، یعنی 1200 متاثرین ہیں۔
انہوں نے کہا کہ گل پلازہ میں آگ لگنا بہت بڑا واقعہ ہے، فائرفائٹر اور ریسکیو کا عملہ 3 جگہوں سے اندر جانے کی کوشش کررہے ہیں، 73 افراد لاپتا ہیں، کوشش ہے لاپتا افراد کا پتا چل جائے۔
اس کے علاوہ مراد علی شاہ نے حکام کو ہدایت کی کہ ملبہ اٹھانے کا کام فوری شروع کریں، آگ لگنے کی فرانزک رپورٹ بنوائیں گے، تاکہ معلوم ہوسکے آگ کیسے لگی، گُل پلازہ واقعہ میں شہید ہونے والوں کے خاندانوں کو فوری معاوضہ دینا چاہتا ہوں۔
ترجمان کے مطابق وزیراعلیٰ سندھ نے گل پلازہ متاثرین کے لیے کمیٹی قائم کردی۔