نائیجیریا میں سب سے بڑی تصویر کا گنیز ورلڈ ریکارڈ قائم

ابوجا: اپنے ملک کی ثقافتوں کا جشن مناتے ہوئے نائیجیریا کے ایک ڈاکٹر نے 10,814.5 مربع فٹ کی تصویر بناکر نیا گنیز ورلڈ ریکارڈ بناڈالا۔
31 سالہ فولا ڈیوڈ تولارام نے کئی دنوں کے دوران 5,000 نشستوں والے اسٹیڈیم میں ایک بڑے کینوس پر واٹر پروف مارکر کا استعمال کرتے ہوئے، تنوع کی وحدت (diverse unity) کے عنوان سے اپنی ڈرائنگ بنائی۔
دنیا کی سب سے بڑی ڈرائنگ میں نائیجیریا کا ایک بڑا نقشہ دکھایا گیا ہے، جس میں مختلف لوگوں کی تصویریں اور ملک کے علاقوں کی ثقافتی تصویریں ہیں۔
ڈیوڈ تولارام نے گنیز ورلڈ ریکارڈز کو بتایا کہ نائیجیریا ایک کثیر ثقافتی قوم کا حامل ملک ہے۔ میں کچھ ایسا بنانا چاہتا تھا جو اس کے مطابق ہو اور لوگوں کو ان کی ثقافتوں کو منانے کا موقع فراہم کرے۔
انہوں نے مزید کہا کہ اس ریکارڈ ڈرائنگ کو شروع کرنے سے پہلے میں نے ذاتی طور پر ان مختلف ثقافتوں کا تجربہ کرنے کے لیے اپنے ملک کا دورہ کیا اور یہی تجربہ تھا جو میں اس ڈرائنگ کو بنانے کے لیے اسٹیڈیم میں لایا تھا۔