کراچی: سابق وفاقی وزیر اور اسٹیٹ بینک آف پاکستان کی سابق گورنر ڈاکٹر شمشاد اختر کراچی میں انتقال کرگئیں۔ میڈیا رپورٹس کے مطابق ان کا انتقال حرکتِ قلب بند ہونے کے باعث ہوا۔
ان کے انتقال پر سیاسی، معاشی اور سماجی حلقوں میں گہرے رنج و غم کا اظہار کیا جارہا ہے۔ ڈاکٹر شمشاد اختر کی نمازِ جنازہ کل نمازِ ظہر کے بعد ادا کی جائے گی، جس میں مختلف شعبۂ ہائے زندگی سے تعلق رکھنے والی اہم شخصیات کی شرکت متوقع ہے۔
ڈاکٹر شمشاد اختر ملک کی ممتاز ماہرِ معاشیات تھیں اور انہوں نے قومی و بین الاقوامی سطح پر پاکستان کا نام روشن کیا۔ وہ اسٹیٹ بینک آف پاکستان کی پہلی خاتون گورنر تھیں، جو ان کی پیشہ ورانہ صلاحیتوں اور قائدانہ کردار کا واضح ثبوت ہے۔ اپنے دورِ گورنری میں انہوں نے مالیاتی نظم و ضبط، بینکاری اصلاحات اور معاشی استحکام کے لیے اہم اقدامات کیے۔
اس کے علاوہ وہ پاکستان اسٹاک ایکسچینج اور ایس ایس جی سی کی چیئرپرسن کے طور پر بھی خدمات انجام دیتی رہیں۔ ڈاکٹر شمشاد اختر کی خدمات کو ہمیشہ یاد رکھا جائے گا اور ان کا انتقال پاکستان کے معاشی و انتظامی شعبے کے لیے ایک بڑا نقصان قرار دیا جا رہا ہے۔