ملک کی پہلی ٹرانس جینڈر اینکر مارویہ ملک پر قاتلانہ حملہ

لاہور: پاکستان سے تعلق رکھنے والی پہلی ٹرانس جینڈر اینکر مارویہ ملک لاہور میں قاتلانہ حملے میں محفوظ رہیں۔
مارویہ ملک پر قاتلانہ حملے کا مقدمہ درج کرلیا گیا ہے، پولیس کو دیے گئے بیان میں ٹرانس جینڈر اینکر مارویہ ملک نے بتایا کہ وہ فارمیسی سے کینٹ کے علاقے میں اپنے گھر واپس آرہی تھیں، اس دوران ان پر فائرنگ کی گئی۔
مارویہ ملک نے بتایا کہ انہیں فون پر دھمکیاں موصول ہورہی تھیں، خوف سے انہوں نے گھر چھوڑ دیا ہے اور لاہور سے باہر منتقل ہوگئی ہیں۔
خیال رہے کہ نجی ٹی وی کو چند سال قبل دیے گئے انٹرویو کے دوران مارویہ کا کہنا تھا کہ میں اپنی کمیونٹی سمیت سب کے لیے ایک مثال ہوں کہ جب خواجہ سرا فیشن اور میڈیا میں جگہ بناسکتے ہیں تو دیگر شعبوں میں بھی وہ اہمیت کے حامل ہیں۔