قرطبہ: اسپین کے شہر قرطبہ میں تاریخی جامع مسجد قرطبہ میں آگ بھڑک اٹھی جس پر فائربریگیڈ نے فوری کارروائی کرکے قابو پالیا۔
غیر ملکی میڈیا کے مطابق تاریخی عمارت میں آگ گزشتہ روز لگی۔ ابتدائی اطلاعات کے مطابق فرش صاف کرنے والی مشین میں شارٹ سرکٹ کی وجہ سے آگ لگی جس نے قریبی علاقے کو لپیٹ میں لے لیا۔
فائر بریگیڈ کے عملے نے فوری کارروائی کرتے ہوئے آگ پر قابو پالیا، اس دوران علاقے کو مکمل خالی کرالیا گیا تھا۔ آگ بجھانے کے بعد بھی پولیس اور فائر بریگیڈ کا عملہ رات بھر جائے وقوعہ پر موجود رہا تاکہ کسی ممکنہ خطرے کو روکا جاسکے۔
قرطبہ کے میئر نے فائر فائٹرز کی بروقت کارروائی کو سراہتے ہوئے کہا کہ فائر بریگیڈ کی فوری کارروائی کی وجہ سے کوئی بڑا سانحہ نہیں ہوا۔
دھیان رہے کہ تاریخی قرطبہ مسجد اب چرچ میں تبدیل ہوچکی ہے اور اسے اب مسجد کیتھیڈرل قرطبہ(Cordoba Mosque-Cathedral) کہا جاتا ہے، یہ یونیسکو عالمی ثقافتی ورثے کا بھی حصہ ہے۔
تاریخی عمارت میں آگ لگنے کی ویڈیوز اور تصاویر سوشل میڈیا پر پھیل گئیں اور بڑی تعداد میں لوگوں نے اسے شیئر کیا اور تشویش کا اظہار کیا۔
مقامی میڈیا کے مطابق ہفتے کو تاریخی عمارت کو دوبارہ سیاحوں کے لیے کھول دیا گیا، تاہم متاثرہ حصہ تاحال بند ہے۔