فٹ بال ورلڈکپ 2026 کے ڈراز کا اعلان، 48 ٹیمیں 12 گروپس میں تقسیم

نیویارک: فٹ بال کی عالمی تنظیم فیفا نے ورلڈکپ 2026 کے ڈراز کا اعلان کردیا۔
فٹ بال ورلڈکپ ڈراز کی تقریب میزبان ملک امریکا میں منعقد کی گئی، جس میں امریکی صدر ڈونلڈ ٹرمپ بھی شریک ہوئے۔
ایونٹ آئندہ برس امریکا سمیت تین ممالک میں کھیلا جائے گا، جن میں کینیڈا اور میکسیکو بھی شامل ہیں۔
ٹورنامنٹ میں شرکت کرنے والی 48 ٹیموں کو 4،4 کے 12 مختلف گروپس میں تقسیم کیا گیا ہے۔
گروپ اے میں میکسیکو، جنوبی افریقا، جنوبی کوریا اور پلے آف ڈی سے کوالیفائر ٹیم شامل کی جائے گی۔
گروپ بی میں کینیڈا، قطر، سوئٹزرلینڈ اور پلے آف اے سے کوالیفائر ٹیم شامل ہوگی۔
گروپ سی میں برازیل، مراکش، اسکاٹ لینڈ اور ہیٹی شامل ہیں جب کہ گروپ ڈی میں میزبان امریکا، آسٹریلیا، پیراگوئے اور پلے آف سی کی کوالیفائر ٹیم شامل ہوگی۔
گروپ ای میں جرمنی، ایکواڈور، آئیوری کوسٹ اور کوراکاؤ شامل ہیں جب کہ گروپ ایف میں نیدرلینڈز، جاپان، تیونس اور پلے آف بی سے کوالیفائر ٹیم شامل ہوگی۔
گروپ جی میں بیلجیئم، ایران، مصر اور نیوزی لینڈ شامل ہیں جب کہ گروپ ایچ میں اسپین، سعودی عرب، یوروگوئے اور کیپ وردے کی ٹیموں کو شامل کیا گیا ہے۔
گروپ آئی میں فرانس، سینیگال، ناروے اور پلے آف 2 کی کوالیفائر ٹیم شامل ہوگی جب کہ گروپ جے میں دفاعی چیمپئن ارجنٹائن، آسٹریا، الجیریا اور اردن شامل ہیں۔
گروپ کے سے پرتگال، ازبکستان، کولمبیا اور پلے آف ون سے کوالیفائر ٹیم شامل ہوگی جبکہ گروپ ایل میں انگلینڈ، کروشیا، پانامہ اور گھانا کو شامل کیا گیا ہے۔