والدہ کی ویڈیو وائرل ہونے پر بہت ہنسی آئی، فیصل قریشی

کراچی: پاکستان کے صف اول کے اداکار فیصل قریشی نے اپنی والدہ و سینئر اداکارہ افشاں قریشی کی وائرل ویڈیو پر ردعمل دیتے ہوئے کہا کہ اُنہیں ویڈیو دیکھ کر خود بہت ہنسی آئی تھی۔
حال ہی میں ایک نجی ٹی وی سے ٹیلیفونک گفتگو میں فیصل قریشی نے کہا کہ سوشل میڈیا کے موجودہ دور میں لوگوں کو یوٹیوب، فیس بُک اور انسٹاگرام پر صرف لائکس اور ویوز چاہیے ہیں، انہی ویوز اور لائکس کے چکر میں لوگ مثبت چیزوں کے بجائے منفی باتوں کو زیادہ پھیلاتے ہیں۔
فیصل نے کہا کہ جب میری والدہ کی ویڈیو وائرل ہوئی تو مجھے وہ دیکھ کر خود بہت ہنسی آرہی تھی، میں نے تو اپنی والدہ سے کہہ دیا تھا کہ آپ ویڈیو پر کوئی ردعمل نہیں دینا لیکن اس کے باوجود والدہ نے ردعمل دیا۔
فیصل قریشی نے کہا کہ ویڈیو پر لوگوں نے ایسے تبصرے کیے کہ جیسے اُنہیں تو کبھی اپنی ماؤں سے ڈانٹ ہی نہیں پڑی یا اُن کے والدین کبھی اُن سے ناراض ہی نہیں ہوئے۔
انہوں نے کہا کہ آج کل لوگ سوشل میڈیا سے پیسے کمانے کے چکر میں چھوٹی سی بات کو بڑھا چڑھاکر پیش کرتے ہیں، اصل ویڈیو کو ایڈٹ کرکے وائرل کیا جاتا ہے۔
اُنہوں نے مزید کہا کہ موجودہ دور میں لوگوں پیسہ کمانے کے چکر میں کسی بھی حد تک گِرسکتے ہیں۔
خیال رہے کہ گزشتہ دنوں فیصل قریشی کی والدہ اور سینئر اداکارہ افشاں قریشی کا ایک انٹرویو وائرل ہوا تھا، جس میں انہوں نے کہا تھا کہ میں نے اللہ سے دعا مانگی تھی کہ اللہ میرے بیٹے کو بہت بڑا اسٹار بنائے اور میری یہ دعا قبول ہوگئی، لیکن مجھ سے ایک غلطی یہ ہوئی کہ مجھے یہ بھی دعا کرنی چاہیے تھی کہ اللہ اسے اچھا بیٹا اور اچھا انسان بھی بنائے۔
ویڈیو سے ایسا تاثر مل رہا تھا کہ فیصل قریشی کی والدہ اپنے بیٹے سے ناراض ہیں، بعدازاں، انسٹاگرام پر ایک پیج کی جانب سے اداکارہ کے انٹرویو میں بولے جانے والے الفاظ کو مینشن کرکے پوسٹ لگائی گئی تھی، جس پر افشاں قریشی نے اس پوسٹ کے کمنٹ سیکشن میں ردِعمل دیا تھا۔
افشاں قریشی نے لکھا تھا کہ آپ لوگ جھوٹی خبریں پھیلانے سے کبھی باز نہ آنا، برائے مہربانی میرے اور میری فیملی سے متعلق ایسی خبریں نہ پھیلائیں، ویوز اور کمنٹس حاصل کرنے کے لیے ان گھٹیا طریقوں کو استعمال کرنا چھوڑ دیں۔