پاکستانی ڈرامے بھارت میں مقبول، سڑکیں ویران ہوجاتی ہیں، فیصل قریشی

کراچی: پاکستان کی صف اول کے اداکار فیصل قریشی کا کہنا ہے کہ پاکستانی ڈرامے بھارت میں مقبول ہیں اور لوگ انہیں بہت پسند کرتے ہیں۔
ایک انٹرویو میں فیصل قریشی کا کہنا تھا کہ بھارتی عوام پاکستانی ڈراموں کے دیوانے ہیں۔ مجھے ایک مشہور بھارتی کوریوگرافر نے بتایا کہ جب پاکستانی ڈرامے میری ذات ذرہ بے نشاں اور ہم سفر دکھائے جاتے تھے تو سڑکیں ویران ہوجاتی تھیں۔
فیصل قریشی نے ایوارڈ شوز کو تنقید کا نشانہ بناتے ہوئے کہا کہ ایوارڈز عوام کی مرضی اور پسند سے نہیں دیے جانے چاہئیں، جس کی سوشل میڈیا پر فالوونگ زیادہ ہو اسے ایوارڈ دینا درست طریقہ کار نہیں۔ ایوارڈ فیلڈ کے ماہرین کی رائے اور فیصلے کے مطابق دیے جانے چاہئیں۔
فیصل قریشی کا مزید کہنا تھا کہ عوام کی پسند سے ایوارڈز دینے کے باعث کبھی کبھی اچھا کام کرنے والے اداکار کی حق تلفی ہوجاتی ہے۔ آج بھی مجھے کوئی سینئر فون کرکے کام کی تعریف کرے تو ایک ہفتے تک خوشی محسوس ہوتی ہے۔