پریشانی میں فنکار خود کو اکیلا نہ سمجھیں، ہم مدد کریں گے، فیصل قریشی

کراچی: معروف اداکار اور میزبان فیصل قریشی نے انڈسٹری کے تمام فنکاروں کے لیے اہم ویڈیو پیغام جاری کیا ہے۔
فیصل قریشی نے اپنے ویڈیو پیغام میں ساتھی فنکاروں کو مخاطب کرتے ہوئے کہا کہ اگر وہ کسی بھی قسم کی پریشانی میں مبتلا ہیں تو خود کو اکیلا نہ سمجھیں اور ان سے رابطہ کریں، وہ اور ان کے ساتھ دیگر اداکار مدد کرنے کے لیے موجود ہیں۔
انہوں نے بتایا کہ فنکاروں کے لیے بنائی گئی آرگنائزیشن ایکٹ پاکستان کی جانب سے اداکارہ عائشہ خان اور حمیرا اصغر کے ایصال ثواب کے لیے قرآن خوانی کا اہتمام کیا گیا تھا۔ انہوں نے کہا کہ فنکاروں کی مدد کیلئے ایکٹ میں لوگ موجود ہیں جو ان کی ہر ممکن مدد کریں گے، چاہے وہ معاشی مسائل ہوں یا صحت کے مسائل۔
فیصل قریشی نے کہا کہ میرے ساتھ حنا بیات، عتیقہ اوڈھو، عمیر رانا سمیت دیگر لوگ 24 گھنٹے مدد کے لیے موجود ہیں، اس لیے براہِ کرم اگر کوئی کسی مسائل اور پریشانی کا سامنا کر رہا ہے تو ہم سے رابطہ کرے۔
سوشل میڈیا پر فیصل قریشی کی یہ ویڈیو وائرل ہورہی ہے، جس پر صارفین کی جانب سے فیصل قریشی کی اس ویڈیو پر تبصرے کرتے ہوئے ان کی اس کوشش کو خوب سراہا جارہا ہے۔