کراچی: سپر اسٹار فہد مصطفیٰ نے ماہرہ خان کے ساتھ نئی فلم کی شوٹنگ مکمل کرلی ہے۔ اس اعلان کے سامنے آنے کے بعد فلمی حلقوں اور مداحوں میں جوش و خروش کی لہر دوڑ گئی ہے۔
فہد مصطفیٰ نے انسٹاگرام پر شوٹنگ مکمل ہونے کی خوش خبری مداحوں کے ساتھ شیئر کرتے ہوئے لکھا کہ فلم پر کئی ماہ کی محنت، لگن اور کہانی کو کیمرے میں قید کیا گیا ہے اور اب ریلیز کے کاؤنٹ ڈاؤن کا آغاز ہوچکا ہے۔ ان کے مطابق ناظرین کے لیے آگے مزید دلچسپ سرپرائزز بھی آنے والے ہیں۔
فلم کی تیاری میں باریک بینی سے منصوبہ بندی، تخلیقی سوچ اور بھرپور محنت شامل ہے، جو شائقین کو ایک معیاری اور متاثر کن سنیما تجربہ فراہم کرے گی۔
ذرائع کے مطابق فلم میں ماہرہ خان کا کردار کہانی کا اہم ستون ہے جب کہ اس فلم کی تحریر اور ہدایت کاری بلال الطاف خان نے کی ہے، جو پاکستانی فلم انڈسٹری کے ابھرتے ہوئے ہدایت کاروں میں شمار ہوتے ہیں اور اپنی منفرد کہانی کہنے کی صلاحیت کے لیے جانے جاتے ہیں۔
انڈسٹری سے جڑے افراد کا کہنا ہے کہ یہ فلم عیدالاضحیٰ کے موقع پر نمائش کے لیے پیش کی جائے گی، جس کے باعث یہ 2026 کی سب سے بڑی ریلیزز میں سے ایک قرار دی جارہی ہے۔
فہد مصطفیٰ کی پوسٹ منظرِعام پر آتے ہی سوشل میڈیا پر خوب چرچا ہونے لگا، جہاں مداحوں اور شوبز شخصیات نے کمنٹس کے ذریعے دونوں بڑے ستاروں کی جوڑی کو اسکرین پر دیکھنے کے لیے بے تابی کا اظہار کیا۔
شائقین کا کہنا ہے کہ فہد مصطفیٰ اور ماہرہ خان کا یہ اشتراک پاکستانی سنیما کے لیے ایک یادگار تجربہ ثابت ہوسکتا ہے۔ ذرائع کے مطابق فلم میں تابش ہاشمی بھی اہم کردار ادا کررہے ہیں۔