حیدرآباد: سندھ کے دوسرے بڑے شہر حیدرآباد کے علاقے لطیف آباد میں آتش بازی کے کارخانے میں خوف ناک دھماکے ہوئے، جس کے نتیجے میں 3 افراد جاں بحق اور متعدد زخمی ہوگئے۔
رپورٹ کے مطابق خوف ناک دھماکے حیدرآباد کے علاقے لطیف آباد کے لغاری گوٹھ میں آتش بازی کے کارخانے میں ہوئے۔
دھماکے سے کارخانہ مکمل تباہ ہوگیا جب کہ خوف ناک آگ بھڑک اٹھی، دھماکے کی آواز دُور دُور تک سنی گئی، جس کے باعث شہریوں میں خوف و ہراس پھیل گیا۔
دھماکے کے بعد پولیس اور ریسکیو ٹیمیں موقع پر پہنچ گئی، ریسکیو حکام کے مطابق اب تک 3 افراد جاں بحق ہوچکے جب کہ متعدد افراد زخمی ہیں۔
وزیراعلیٰ سندھ نے حیدرآباد فیکٹری دھماکے کا نوٹس لیا اور کہا کہ زخمی مزدوروں کو فوری اور بہترین طبی امداد دی جائے۔
ترجمان کے مطابق وزیراعلیٰ مُراد علی شاہ نے واقعے کی فوری رپورٹ طلب کرلی، کمشنر و ڈی سی حیدرآباد سے فوری حقائق نامہ طلب کرتے ہوئے فیکٹری میں حفاظتی انتظامات کا مکمل آڈٹ کرنے کا حکم دیا۔
مُراد علی شاہ نے کہا کہ دھماکے کے ذمے داروں کے خلاف سخت کارروائی ہوگی، مزدوروں کے تحفظ میں کوتاہی برداشت نہیں کی جائے گی۔