خلیل الرحمان سے شادی کی افواہوں پر ڈر گئی تھی، ایشل فیاض

کراچی: اداکارہ ایشل فیاض کی معروف ڈرامہ نگار اور ہدایت کار خلیل الرحمان قمر کے ساتھ شادی کی افواہوں پر وضاحت سامنے آگئی۔
ایشل فیاض نے حال ہی میں ندا یاسر کے شو ’’شان سحور‘‘ میں شرکت کی، جہاں ندا نے ان سے ان کی اور خلیل الرحمان قمر کی شادی سے متعلق پھیلی قیاس آرائیوں کے بارے میں پوچھا تو ایشل نے جواب دیا، اللہ جانتا ہے کہ میری اور خلیل الرحمان کی شادی کی افواہیں کس نے پھیلائیں مجھے اس بارے میں کوئی علم نہیں۔
اداکارہ کا کہنا تھا کہ جب میری اور خلیل الرحمان کی شادی کی افواہیں پھیلیں تو میں ڈر گئی تھی اور میں اپنے کمرے میں اکیلے بیٹھ کر رو رہی تھی لیکن مجھے میری والدہ نے سمجھایا ڈر کے بیٹھنے سے کچھ نہیں ہوگا لوگوں کے سامنے جاؤ اور وضاحت دو جس کے بعد میں نے انٹرویو میں ان تمام افواہوں کو جھوٹا قرار دیا۔
اداکارہ ایشل نے کہا خلیل الرحمان قمر میری فیملی کی طرح ہیں اور ان کی اہلیہ بہت غصے والی ہیں جب میری اور خلیل صاحب کی شادی کی افواہیں پھیلیں تو ان کی بیوی نے بہت سارے بلاگرز کو یہ جھوٹی افواہیں پھیلانے کے لیے ڈانٹا تھا۔
ایشل فیاض نے جھوٹی افواہیں پھیلنے کا ذمے دار سوشل میڈیا کو قرار دیتے ہوئے کہا پہلے زندگی بہت آسان تھی لیکن سوشل میڈیا کے فعال ہونے کے بعد لوگ منفی ہوگئے ہیں اور دوسروں کو پریشان کرتے ہیں۔ ایشل کے برابر میں ہی بیٹھی اداکارہ نازش جہانگیر نے کہا کہ سوشل میڈیا انسانوں کو ذہنی ٹارچر کرتا ہے۔
ایشل فیاض نے شو کے دوران اپنے اگلے پروجیکٹ کے بارے میں بتاتے ہوئے کہا میں اپنی اگلی فلم ’’میں ہوں تیری گلناز‘‘ میں کام کررہی ہوں اور یہ فلم بھی خلیل الرحمان قمر کی ہی ہے۔
خیال رہے کہ سال بھر قبل اداکارہ ایشل فیاض اور خلیل الرحمان قمر کی شادی کی افواہیں سوشل میڈیا پر پھیلی تھیں بعد میں دونوں کی جانب سے ان افواہوں کی تردید کردی گئی تھی۔ ایشل فیاض نے خلیل الرحمان قمر کی لکھی ہوئی فلم ’’کاف کنگنا‘‘ میں بطور ہیروئن کام کیا تھا اس فلم کی ہدایات بھی خلیل الرحمان نے ہی دی تھیں۔