ارطغرل نے پاکستانی مداحوں کو اپنی عالمی شہرت کی وجہ قرار دے دیا

کراچی: مشہور ڈرامے ارطغرل غازی میں مرکزی کردار نبھانے والے انگین التان کا کہنا ہے کہ پاکستانی ناظرین کی وجہ سے انہیں دنیا بھر میں شہرت ملی۔
ترک اداکار انگین التان دوزیاتان جو مشہور ڈرامہ سیریز ارطغرل غازی میں ارطغرل کے کردار کیلئے دنیا بھر میں مشہور ہیں، ان دنوں کینیڈا کے دورے پر ہیں۔ اس دوران وہ مختلف مقامات پر مداحوں سے ملاقات کررہے ہیں اور ریڈ سی فلم فیسٹیول میں بھی شرکت کرچکے ہیں۔
ایک گفتگو کے دوران انگین التان نے اپنی عالمی مقبولیت میں پاکستانی مداحوں کے کردار کو سراہا اور اپنی عالمی شہرت کا سہرا پاکستانی مداحوں کے سر باندھ دیا۔
ایک انٹرویو کے دوران انہوں نے کہا کہ پاکستانی عوام کی تاریخی کرداروں، خاص طور پر ارطغرل جیسے کرداروں سے محبت نے ان کی شہرت کو ترکی سے باہر پھیلانے میں اہم کردار ادا کیا۔ ان کا کہنا تھا کہ پاکستانی ناظرین میں اس کردار کے لیے خاص محبت دیکھی گئی ہے، جو دیگر ممالک کے مداحوں سے مختلف ہے۔
انگین التان نے مزید کہا کہ ارطغرل کا کردار کرنے کے بعد انہیں ایک منفرد شہرت ملی اور یہ ڈرامہ ان کے لیے بہت خاص ہے کیونکہ اس نے انہیں دنیا بھر میں مقبول بنایا۔
خیال رہے کہ انسٹاگرام پر انگین التان کے 5.2 ملین سے زائد فالوورز ہیں، جن میں پاکستان، بھارت اور بنگلادیش کے مداح بھی شامل ہیں۔