اسلام آباد/ کراچی: پاکستان پیپلز پارٹی کی سینٹرل ایگزیکٹو کمیٹی (سی ای سی) نے بلوچستان میں حکومت بنانے کا فیصلہ کرلیا۔
گزشتہ روز پیپلزپارٹی کے سینٹرل ایگزیکٹو کمیٹی کے اجلاس کے پہلے دن کی اندرونی کہانی سامنے آگئی، جس میں سی ای سی پنجاب کے ارکان نے نگراں صوبائی حکومت کے خلاف شکایات کے انبار لگادیے۔
ذرائع کے مطابق اجلاس میں پنجاب کے ارکان نے کہا کہ پنجاب کی نشستوں پر ڈاکہ ڈالا گیا جو منتخب ہوئے وہ تو دوڑ میں ہی نہیں تھے، جیتی ہوئی نشستوں پر نگراں صوبائی حکومت نے انتظامیہ کی مدد سے ہماری کامیابی کو شکست میں بدلا۔
ذرائع کے مطابق پیپلزپارٹی کی سی ای سی نے پی پی بلوچستان کو خراج تحسین پیش کیا اور صوبے میں حکومت بنانے کا فیصلہ کیا۔
ذرائع کا کہنا ہے کہ سی ای سی میں فیصلہ کیا گیا ہے کہ بلوچستان میں حکومت بنانے کے لیے دیگر جماعتوں سے رابطوں کے لیے آج اجلاس میں کمیٹی بھی بنائی جائے گی۔
ذرائع کے مطابق پہلے دن اجلاس میں (ن) لیگ کی سربراہی میں بننے والی حکومت میں شامل نہ ہونے پر زیادہ ارکان نے رائے دی جب کہ ارکان نے پی ٹی آئی کے آزاد ارکان سے بات چیت کرنے پر بھی رائے دی۔
اجلاس میں تجویز دی گئی کہ (ن) لیگ کی حکومت بنواکر خود مضبوط اپوزیشن کی جائے۔