اسلام آباد: وزیراعظم شہباز شریف کا کہنا ہے کہ 190 ملین پاؤنڈ کی خطیر رقم سے بننے والی دانش یونیورسٹی دنیا کی ممتاز ترین جامعات کے ہم پلہ ہوگی جہاں ماڈرن سائنسز کی تعلیم دی جائے گی۔
اسلام آباد میں دانش یونیورسٹی آف ایمرجنگ سائنسز کے سائٹ ریویو کی تقریب سے خطاب کرتے ہوئے انہوں نے کہا کہ خوشی کا موقع ہے کہ یہاں پر 100 ایکڑ کا رقبہ دانش یونیورسٹی کے لیے مختص کردیا گیا ہے۔
ان کا کہنا تھا کہ یہ دانش گاہ یا یہ یونیورسٹی نہ صرف پاکستان بلکہ دنیا میں اپنا مقام حاصل کرے گی، بہترین تعلیم اور اساتذہ کے حوالے سے، ریسرچ اینڈ ڈیولپمنٹ کے حوالے سے اور اس دانش گاہ کا مرکزی نکتہ اپلائیڈ سائنسز ہوگا، پورے پاکستان میں بہت اچھی اور شاندار درس گاہیں ہیں، لیکن ریسرچ اینڈ ڈیولپمنٹ اور جو ماڈرن سائنسز ہیں۔
ان کا کہنا تھا کہ ان کی ایپلی کیشنز کے حوالے سے، میرے خیال میں پاکستان میں کوئی ایسی درس گاہ نہیں جس کو ہم دنیا کی کسی اور یونیورسٹی کے مقابلے میں ہم پلہ قرار دے سکیں۔
وزیراعظم نے کہا کہ یہ یونیورسٹی دنیا کی بہترین یونیورسٹیوں چاہے آپ اسٹینفورڈ سمجھ لیں، برکلن، کولمبیا یا ایم آر ٹی سمجھ لیں، یعنی یہ دنیا کی ممتاز یونیورسٹیز سے کم درجے کی نہیں ہوگی اور اگلے سال 14 اگست 2026 کو اس کا پہلا سیکشن فعال ہوجائے گا۔
شہباز شریف نے کہا کہ یہاں پر دنیا کے ممتاز ترین لوگ بیٹھے ہیں، دنیا بھر میں آپ کے لوگ موجود ہیں، یہاں کام کرنے کے حوالے سے ہم آپ سے تعاون لیں گے، اس یونیورسٹی کا حکومت پاکستان سے کوئی تعلق نہیں ہوگا، پنجاب میں ہم نے پنجاب کنڈی اینڈ لیور انسٹی ٹیوٹ کے لیے قانون بنایا تھا کہ ایک فاؤنڈیشن اور گورننگ باڈی ہوگی جو اس کو چلائے گی اور حکومت پنجاب کا اس سے کوئی لینا دینا نہیں ہوگا۔
انہوں نے کہا کہ دانش اسکولوں کے بچے، بچیاں جو انتہائی ذہین تھے لیکن ان کا مالی پس منظر ناقابل بیان تھا، ان بچوں کے والدین نہیں تھے، دانش اسکولوں نے انہیں بہترین ماحول فراہم کیا، وہ بہترین تعلیمی سہولتیں ہیں، وہیں بہترین اساتذہ ہیں جو زیادہ تنخواہ چھوڑ کر اپنے ملک کے بچوں کو پڑھانے کے لیے یہاں خدمات سرانجام دینے کے لیے آئے۔
ان کا کہنا تھا کہ اگر ہم اپنے بچے، بچیوں کو تعلیم نہیں دیں گے تو وہ دیہات کی دھول میں گم ہوجائیں گے، ہم نے ملک میں اعلیٰ تعلیم، معیاری تعلیم سب کے لیے فراہم نہیں کی تو ملک خداداد وہ عظمت و اونچائی حاصل نہیں کرسکے گا۔
وزیراعظم نے کہا کہ اس یونیورسٹی کو 190 ملین پاؤنڈ کی خطیر رقم سے بنایا جارہا ہے، میں سابق چیف جسٹس قاضی فائز عیسیٰ اور موجودہ چیف جسٹس یحییٰ آفریدی کا شکر گزار ہوں جنہوں نے 190 پاؤنڈ سپریم کورٹ کے اکاؤنٹس سے واپس کیے اور کہا کہ اس سے ہمارا کوئی تعلق نہیں ہے۔
شہباز شریف نے کہا اس یونیورسٹی میں امیر و غریب سب کے بچے آئیں گے، جو لوگ صاحب حیثیت ہیں، وہ فیس ادا کریں گے اور غریب کے ذہین بچے، بچیاں میرٹ پر یہاں تعلیم حاصل کریں گے۔