چوہدری اسلم نے مٹی سے وفا کی، بیوہ کا دھرندر کیخلاف قانونی چارہ جوئی کا عندیہ

کراچی: سندھ پولیس کے شہید افسر چوہدری اسلم کی بیوہ نورین اسلم نے بھارتی فلم دھرندر پر شدید غصے کا اظہار کرتے ہوئے قانونی چارہ جوئی کا ارادہ ظاہر کیا ہے۔
نورین اسلم نے چند روز قبل نجی ٹی وی سے گفتگو کے دوران بھارتی فلم دھرندر کے ٹریلر میں چوہدری اسلم کے کردار اور رحمان ڈکیت سمیت پیپلز پارٹی کی مبہم عکاسی پر بھی گفتگو کی۔
نورین اسلم نے فلم کی ریلیز سے قبل جاری کیے گئے ٹریلر میں نامناسب ڈائیلاگ پر غصے کا اظہار کرتے ہوئے کہا کہ فلم کے ٹریلر میں کہا گیا کہ شیطان اور جن سے پیدا ہونے والے بچے کو چوہدری اسلم کہتے ہیں، میرے نزدیک اس جملے سے چوہدری کی والدہ کی کردار کشی ہوتی ہے، ہم مسلمان ہیں اور ایک اسلامی ملک میں رہتے ہیں، ہمارے یہاں شیطان اور جنوں سے عورتوں کے تعلقات نہیں بنتے، چوہدری کی والدہ پاکیزہ اور پردہ دار خاتون تھیں، اگر فلم میں چوہدری کے خلاف کوئی پروپیگنڈا کرنے کی کوشش کی تو ہم چوہدری کے حق دار ہیں، قانونی چارہ جوئی کا حق رکھتی ہوں۔
نورین اسلم کے مطابق اداکار کبھی غلط نہیں ہوتا یہ رائٹر کا کمال ہے، بھارتی رائٹرز نے ہمیشہ پاکستان کو دہشت گرد ملک دکھایا ہے اور اُس وقت گرفتار کیے گئے بھارتی کرنل پر خاموشی اختیار کی، جس نے اعتراف کیا تھا کہ اس نے چوہدری اسلم پر جوا کھیلا ہے، چوہدری ہیرو ہے یا وِلن یہ سب کا اپنا اپنا نظریہ ہے مجھے اس سے اختلاف نہیں لیکن چوہدری نے اپنی مٹی سے وفا کی ہے۔
دوسری جانب فلم میں رحمان ڈکیت کے کردار پر بات کرتے ہوئے انہوں نے کہا کہ بین الاقوامی سطح پر ٹی ٹی پی دہشت گرد تنظیم ہے، رحمان ڈکیت اتنا بڑا دہشت گرد نہیں تھا جتنا بڑا اسے دھرندر میں دکھایا گیا، چوہدری نے رحمان سے بڑے بڑے دہشت گردوں کا انکاؤنٹر کیا ہے۔
شہید پولیس افسر کی بیوہ کا مزید کہنا تھا کہ فلم دیکھنے پر پتا چلے گا کیا ٹی ٹی پی کا ترجمان سنجے دت کو کال کرتا ہے یا نہیں اور اگر کرتا ہے تو وہ اس کا کیا جواب دیتے ہیں؟ کیونکہ چوہدری نے کیا کہا تھا وہ تو پوری دنیا جانتی ہے آج بھی وہ کلپ یوٹیوب پر موجود ہے، دنیا تسلیم کرتی ہے کہ چوہدری ایک دلیر شخصیت تھے۔
ایک دوسرے انٹرویو میں نورین اسلم نے چوہدری اسلم سے شادی کے حوالے سے بتایا کہ چوہدری میرے ماموں کے بیٹے ہیں، وہ مجھے شادی سے پہلے پسند کرتے تھے لیکن میں ان سے شادی نہیں کرنا چاہتی تھی، والدہ نے مار پیٹ کرکے شادی کے لیے راضی کیا لیکن اب یہ کہوں گی اگر زندگی کروڑ بار بھی ملے تو خدا سے مرد چوہدری اسلم مانگوں گی۔
نورین اسلم کا کہنا تھا کہ اسلم جب 1994 میں ایس ایچ او تھے، وہ وقت بوری بند لاشوں کا تھا جب اسلم نے کارروائی ڈالی تو لوگوں نے ان کو چوہدری کہنا شروع کردیا، یوں پٹھان ہونے کے باوجود چوہدری ان کی پہچان بن گئی، اسلم نے کہا تھا کہ مجھ پر فلمیں بنیں گی، کیوں کہ میں نے پاکستان کلیئر کیا ہے لیکن میں بھی پٹھان ہوں، شہادت پاکر جاؤں گا، اپنے ملک کے ساتھ بے غیرتی نہیں کرسکتا۔