لاہور: پی سی بی نے چیمپئنز ٹرافی کے لیے بھارت کے پاکستان آنے سے انکار کے بعد آئی سی سی کو خط لکھ دیا۔
ذرائع کے مطابق پاکستان کرکٹ بورڈ نے چیمپیئنز ٹرافی کی میزبانی کے معاملے پر انٹرنیشنل کرکٹ کونسل کو خط لکھا، جس میں کرکٹ بورڈ نے بھارت کے پاکستان آنے سے انکار کی وجوہ طلب کی ہیں۔
پی سی بی نے آئی سی سی کو لکھے گئے خط میں مطالبہ کیا کہ بھارتی بورڈ انکار کی وجہ لکھ کر دے۔
ذرائع کا کہنا ہے کہ خط میں پی سی بی نے آئی سی سی کو چیمپیئنز ٹرافی پاکستان میں کرانے پر ہی زور دیتے ہوئے حکومتی مؤقف سے آگاہ کردیا ہے۔
چند روز قبل بھارتی کرکٹ بورڈ نے زبانی طور پر آئی سی سی کو بتایا تھا کہ وہ ٹیم پاکستان نہیں بھیجے گا، جس کے بعد آئی سی سی نے پی سی بی کو بھارت کے پاکستان نہ آنے سے متعلق آگاہ کیا تھا۔
دوسری جانب پاکستان کرکٹ بورڈ نے آئی سی سی چیمپئنز ٹرافی کے لیے اپنی ٹیم نہ بھیجنے کے بی سی سی آئی کے فیصلے پر سخت مؤقف اپناتے ہوئے مائنس انڈیا فارمولے پر غور شروع کردیا ہے۔
ادھر بھارتی میڈیا رپورٹس میں دعویٰ کیا جارہا ہے کہ ہائبرڈ ماڈل سے انکار پر آئی سی سی چیمپئنز ٹرافی جنوبی افریقا منتقل کردی جائے گی۔
خیال رہے کہ آئی سی سی چیمپئنز ٹرافی آئندہ سال 19 فروری سے 9 مارچ تک پاکستان میں شیڈول ہے، جس میں 8 ٹیمیں شرکت کریں گی۔