لندن میں چاہت فتح علی خان پر انڈوں سے حملہ

لندن: اپنی مضحکہ خیز گائیکی کے باعث شہرت کی بلندیوں پر پہنچنے والے گلوکار چاہت فتح علی خان پر برطانیہ کے دارالحکومت لندن میں نامعلوم نوجوانوں نے انڈوں سے حملہ کردیا۔
سوشل میڈیا پر وائرل ہونے والی ویڈیوز میں دیکھا جاسکتا ہے کہ چاہت علی خان سڑک کنارے کھڑے ہوکر اپنی کوئی پروموشنل ویڈیو ریکارڈ کروارہے ہیں۔
اسی دوران اچانک دو نوجوان یکے بعد دیگرے سبک رفتاری سے سامنے آئے اور ان کے سر پر انڈے مار کر آناً فاناً فرار بھی ہوگئے۔
ایک انڈا چاہت علی خان کے سر پر جب کہ دوسرا انڈا سینے پر لگا۔ جس سے ان کا چہرہ اور کپڑے خراب ہوگئے۔
چاہت فتح علی خان اس غیر متوقع اور اچانک پڑنے والی افتاد پر حیران اور پریشان رہ گئے۔
ابھی تک یہ واضح نہیں ہوسکا کہ حملہ آور کون تھے اور واقعے کے محرکات کیا تھے۔
پولیس کی جانب سے تحقیقات سے متعلق بھی کوئی باضابطہ بیان سامنے نہیں آیا۔