یومِ فضائیہ پر ملک بھر میں تقریبات،شہدا کے لیے خصوصی دعائیں

کراچی:یومِ فضائیہ کی مناسبت سے ملک بھر میں پاک فضائیہ کے ایئر بیسز اور تنصیبات پر آج 7 ستمبر کو یومِ شہدا کے حوالے سے تقریبات کا انعقاد کیا جارہا ہے۔
ترجمان پاک فضائیہ کے مطابق دن کا آغاز 1965ء اور 1971ء کے شہداء کے لیے خصوصی دعاؤں سے کیا گیا، مرکزی تقریب ایئر ہیڈ کوارٹرز اسلام آباد میں ہوئی۔
تقریب سے خطاب کرتے ہوئے ایئر چیف ظہیر احمد بابر سندھو نے کہا کہ ملک و قوم کے لیے جانیں قربان کرنے والے تمام ہیروز کو خراج تحسین پیش کرتے ہیں۔
انہوں نے کہا کہ پاک فضائیہ خطے میں پاکستان کی سالمیت اور وقار کے دفاع کے لیے مکمل تیار ہے، کشمیری بھائیوں اور بہنوں کی اخلاقی، سیاسی اور سفارتی مدد جاری رکھیں گے۔