والدہ کی میت پر میک اپ کرکے آنے والیوں کو نہیں بھول سکتی، مدیحہ نقوی

کراچی: نامور میزبان مدیحہ نقوی نے انکشاف کیا ہے کہ کچھ خواتین ان کی والدہ کے جنازے پر میک اپ کرکے آئی ہوئی تھیں۔
مدیحہ نقوی نے حال ہی میں اپنے مارننگ شو کی ایک قسط میں اپنی والدہ کے انتقال کا دن یاد کیا اور بتایا کہ کس طرح لوگ تیار ہوکر آئے تھے اور اس چیز نے انہیں کافی تکلیف پہنچائی تھی۔
مدیحہ نقوی نے کہا مجھے آج بھی یاد ہے میں نے ہوش و حواس میں اپنے سامنے کوئی میت دیکھی تو وہ میری ماں کی میت تھی۔
انہوں نے کہا، والدہ کے انتقال کے کچھ گھنٹوں بعد ہی بہت سے لوگ گھر میں اکٹھے ہوگئے تھے، مجھے یاد ہے ان میں سے جس جس نے میک اپ کیا ہوا تھا، جن خواتین نے گہری لپ اسٹکس لگائی ہوئی تھیں۔
مدیحہ کا کہنا تھا کہ یہ ایسی چیز ہے جو میں زندگی بھر فراموش نہیں کرسکتی، ہوسکتا ہے وہ لوگ کہیں سے آرہے ہوں لیکن میت کے کچھ آداب ہوتے ہیں، یہی تو ہے جو اللہ تعالیٰ آپ کو بتاتا ہے کہ بس یہ تھی دنیا، اب سب ختم۔
انہوں نے کہا کہ جب کسی کا انتقال ہوتا ہے تو یہ یاددہانی ہوتی ہے کہ اللہ بتارہا ہوتا ہے بس جو گھر بنایا تھا یا جو دنیا تھی وہ سب ختم، اب میری جانب لوٹ آؤ۔