شادی سے پہلے مغربی لباس پہنتی تھی، محبت میں برقع بھی پہنا، فریال گوہر

لاہور: ٹی وی اور تھیٹر کی سینئر اداکارہ اور سماجی کارکن فریال گوہر نے انکشاف کیا ہے کہ شادی سے قبل وہ مغربی طرز کا لباس، خصوصاً منی اسکرٹ پہنتی تھیں تاہم شادی کے بعد محبت میں برقع تک پہن لیا۔
فریال گوہر نے اپنی خاندانی پس منظر کے بارے میں بتایا کہ ان کی والدہ کا تعلق بھارتی ریاست گجرات سے تھا، لیکن ان کے آبا واجداد 1910 سے پہلے جنوبی افریقا منتقل ہوگئے تھے، ان کی والدہ بعدازاں برطانیہ چلی گئیں، جہاں ان کے والد جو پاکستانی فوج میں تھے، سفارت خانے میں تعیناتی کے دوران ان سے ملے اور دونوں نے شادی کی۔
فریال گوہر کے مطابق ان کی والدہ مغربی ماحول میں پلی بڑھی تھیں، اسی وجہ سے وہ خود بھی نوجوانی میں مغربی لباس پہنتی تھیں، ان کے والد گردوں کی بیماری کے باعث جلد انتقال کرگئے۔
فریال گوہر نے بتایا کہ 17 برس کی عمر میں انہیں پی ٹی وی میں مختصر کردار ملا، جس میں صرف ان کا ہاتھ دکھایا گیا، بعدازاں وہ ہاتھوں کی ماڈلنگ اور ڈراموں تک پہنچیں، جہاں ان کی ملاقات جمال شاہ سے ہوئی اور دونوں نے شادی کرلی۔
انہوں نے اعتراف کیا کہ جمال شاہ کے ڈمپل اور شخصیت نے انہیں متاثر کیا، ان کی محبت میں برقع تک پہن لیا، سسرال والے ان کے اداکاری کے پیشے سے خوش نہیں تھے اور شادی کے بعد انہیں سخت رویے کا سامنا کرنا پڑا۔
انہوں نے کہا کہ شادی ختم ہونے کا سبب صرف جمال شاہ کا سست ہونا نہیں تھا بلکہ کئی دیگر وجوہ بھی تھیں، جنہیں انہوں نے بیان کرنے سے گریز کیا۔