میرپور: بنگلادیش نے ٹی20 سیریز کے پہلے میچ میں پاکستان کی پوری ٹیم کو 110 رنز پر ڈھیر کرنے کے بعد 3 وکٹوں کے نقصان پر باآسانی ہدف حاصل کرکے میچ 7 وکٹوں سے جیت لیا اور سیریز میں 0-1 کی برتری حاصل کرلی۔
بنگلادیش کے شہر میرپور میں شیر بنگلا نیشنل اسٹیڈیم میں کھیلے گئے سیریز کے پہلے ٹی20 میں میزبان ٹیم کے کپتان لٹن داس نے ٹاس جیت کر پاکستان کو پہلے بیٹنگ کی دعوت دی۔
پاکستان نے بیٹنگ شروع کی تو دوسرے اوور میں 18 کے اسکور پر صائم ایوب 6 رنز بناکر تسکین احمد کی وکٹ بنے، جس کے بعد بیٹرز کی لائن لگ گئی اور ایک موقع پر صرف 46 کے مجموعی اسکور پر پاکستان کے 5 کھلاڑی پویلین لوٹ گئے تھے۔
محمد حارث 4، کپتان سلمان علی آغا 3، حسن نواز صفر اور حسن نواز 3 رنز بنا کرآؤٹ ہوئے۔
فخر زمان اور خوشدل شاہ نے چھٹی وکٹ کی شراکت میں ٹیم کا اسکور 70 رنز تک پہنچایا مگر فخر 44 رنز کی اننگز کھیل کر رن آؤٹ ہوگئے۔
خوشدل 17 رنز بناکر آؤٹ ہوئے، عباس آفریدی 22، فہیم اشرف 5 اور سلمان مرزا کھاتہ کھولے بغیر رن آؤٹ ہوکر پویلین لوٹ گئے۔
پاکستان کی پوری ٹیم آخری اوور کی تیسری گیند پر 110 رنز بنا کر آؤٹ ہوگئی۔
تسکین احمد نے بنگلادیش کی جانب سے سب سے زیادہ 3 وکٹیں حاصل کیں اور مستفیض الرحمان نے دو کھلاڑیوں کو آؤٹ کیا۔
بنگلادیش نے آسان ہدف کے تعاقب میں بیٹنگ کا آغاز ناقص انداز میں کیا اور پاکستان کی جانب سے اپنا پہلا انٹرنیشنل میچ کھیلنے والے سلمان مرزا نے اپنے پہلے اوور کی پانچویں گیند پر حاصل کی۔
پرویز حسین نے تنزید کے جلدی آؤٹ ہونے کے بعد ذمے داری سنبھالی، حالانکہ کپتان لٹن داس نے بھی سلمان مرزا کی دوسری وکٹ بن گئے تھے اور صرف ایک رن کا اضافہ کرپائے۔
توحید ہریدوئے نے پرویز کا اچھا ساتھ نبھایا اور 36 رنز کی اننگز کھیل کر ٹیم کا اسکور 80 رنز تک پہنچایا، لیکن عباس آفریدی نے ان کی وکٹیں اڑا دیں۔
پرویز حسین ایمون نے 39 گیندوں پر 3 چوکوں اور 5 چھکوں کی مدد سے اپنی نصف سنچری بنائی اور آؤٹ ہوئے بغیر 56 رنز کی اننگز کھیلی، دوسرے اینڈ سے ذاکر علی نے 10 گیندوں پر 3 چوکوں کی مدد سے 15 رنز بنا کر ٹیم کو جیت دلائی۔
بنگلادیش کی ٹیم نے 111 رنز کا ہدف 16 ویں اوور کی تیسری گیند پر 112 رنز بنا کر حاصل کرلیا اور سیریز میں 0-1 کی برتری حاصل کرلی۔