آسٹریلوی کرکٹر عثمان خواجہ آخری ٹیسٹ کو یادگار بنانے میں ناکام

سڈنی: آسٹریلیا کے کامیاب بلے بازوں میں شامل پاکستانی نژاد عثمان خواجہ اپنے انٹرنیشنل کیریئر کے آخری میچ کو یادگار نہ بناسکے۔
سڈنی میں کھیلے گئے ایشیز سیریز کے آخری میچ میں آسٹریلوی ٹیم نے 5 وکٹوں سے فتح حاصل کی، تاہم عثمان خواجہ بڑی اننگز کھیلنے میں ناکام رہے۔
عثمان خواجہ جب آخری مرتبہ بیٹنگ کرنے کے لیے میدان میں آئے، انگلش ٹیم کے کھلاڑیوں نے انہیں گارڈ آف آنر پیش کیا۔
کریز پر پہنچنے پر ساتھی کھلاڑی مارنس لبوشین نے گلے لگا کر ان کا استقبال کیا۔
عثمان خواجہ پہلی اننگز میں 17 اور دوسری اننگز میں صرف 6 رنز بناسکے۔
آؤٹ ہوکر واپس جاتے ہوئے انہوں نے میدان میں سجدہ شکر بھی ادا کیا۔ اس دوران ان کی اہلیہ ریچل خواجہ کی آنکھوں سے آنسو چھلک پڑے۔
عثمان خواجہ کے اہل خانہ سمیت مداحوں کی جانب سے بھی انہیں زبردست خراج تحسین پیش کیا گیا۔
واضح رہے کہ عثمان خواجہ نے آسٹریلیا کے لیے 88 ٹیسٹ میچز میں 16 سنچریز اور 28 نصف سنچریز کی مدد سے 6229 رنز بنا رکھے ہیں۔