میلبورن: آسٹریلوی سرزمین پر گلوکار عاصم اظہر کی اذان دینے کی ویڈیو سوشل میڈیا پر وائرل ہوگئی۔
گلوکار عاصم اظہر نے اپنے آفیشل انسٹاگرام اکاؤنٹ پر ایک ویڈیو شیئر کی، جس میں انہیں اذان دیتے ہوئے دیکھا جاسکتا ہے۔
ویڈیو کو شیئر کرتے ہوئے عاصم اظہر نے کیپشن میں خوشی کا اظہار کرتے ہوئے لکھا کہ ’سچ میں یہ جمعہ زندگی کا بہترین دن تھا، جب مجھے آسٹریلیا کے شہر میلبورن میں بسنے والے مسلمانوں کے لیے اذان دینے کا موقع ملا۔
انہوں نے مزید لکھا کہ اس لمحے کی ایک اور خوبصورت چیز یہ ہے کہ یہاں تمام مسلک کے مسلمان ایک ساتھ نماز ادا کرنے آئے ہوئے تھے۔
ویڈیو میلبورن کے کرکٹ گراؤنڈ میں اتوار کو پاکستان اور بھارت کے مابین ہونے والے پلے آف سے قبل سامنے آئی ہے، میچ کا حوالہ دیتے ہوئے عاصم نے اپنے مداحوں کو بے فکر رہنے کا مشورہ دیتے ہوئے یہ بھی بتایا کہ سب نے نماز کے بعد اتوار کو دوران میچ بارش نہ ہونے کی دعا بھی مانگی ہے۔
عاصم اظہر کی یہ ویڈیو سوشل میڈیا کے مختلف پلیٹ فارمز پر خوب وائرل ہورہی ہے اور مداحوں کی جانب سے اس ویڈیو کو بے حد پسند کیا جارہا ہے۔