راولپنڈی: چیف آف آرمی اسٹاف جنرل سید عاصم منیر نے کہا ہے کہ شہدا اور غازی ہمارا فخر ہیں جب کہ آزادی اور امن ہمارے بہادر سپوتوں کی قربانی کا نتیجہ ہے۔
راولپنڈی میں جنرل ہیڈ کوارٹرز (جی ایچ کیو) میں مختلف آپریشنز کے دوران جرأت و بہادری کا مظاہرہ کرنے والے افسروں اور جوانوں کو اعزازات دینے کی تقریب کا انعقاد کیا گیا، جس میں آرمی چیف جنرل سید عاصم منیرنے میڈلز تقسیم کیے۔
ترجمان پاک فوج (آئی ایس پی آر) کے مطابق جی ایچ کیو میں منعقدہ تقریب میں آرمی چیف جنرل سید عاصم منیر نے آپریشنز کے دوران قوم کے لیے جرأت و بہادری کی داستانیں رقم کرنے والے افسروں اور جوانوں کو فوجی اعزازات سے نوازا۔
تقریب میں سینئر فوجی حکام اور اعزاز حاصل کرنے والے جوانوں اور افسروں کے خاندانوں نے شرکت کی۔ افسروں اور جوانوں کو ستارۂ امتیاز (ملٹری) اور تمغہ بسالت سے نوازا گیا۔ شہدا کے میڈلز ان کے اہل خانہ نے وصول کیے۔
آرمی چیف جنرل عاصم منیر نے تقریب سے خطاب کرتے ہوئے کہا کہ شہدا اور غازی ہمارا فخر ہیں۔ آج ہماری آزادی اور امن ملک کے ان بہادر سپوتوں کی قربانیوں کا نتیجہ ہے۔ مادر وطن کے لیے جان کا نذرانہ پیش کرنے والے جرأت اور بہادری کے پیکر شہدا کے اہل خانہ کی ثابت قدمی اور عزم بھی قابل تحسین ہے۔
آرمی چیف جنرل عاصم منیر نے کہا کہ دہشت گردی کے خاتمے کے لیے جاری آپریشنز کے دوران دہشت گردی کے خطرات اور کارروائیوں کو ناکام بنانے کے لیے پاک فوج اور قانون نافذ کرنے والے اداروں کی انتھک محنت، کوششیں اور غیرمتزلزل عزم قابل تعریف ہے۔