ابھی شادی نہیں ہوئی، جب ہوگی مداحوں سے شیئر کروں گی، انمول بلوچ

کراچی: اداکارہ انمول بلوچ نے اپنی شادی کے حوالے سے میڈیا اور سوشل میڈیا پر پھیلنے والی افواہوں پر بالآخر ردعمل دے ہی دیا۔
پچھلے چند ہفتوں سے انمول بلوچ کی شادی کے بارے میں مسلسل قیاس آرائیاں کی جا رہی تھیں، لیکن اداکارہ نے اس بارے میں کوئی تبصرہ نہیں کیا تھا۔ اب انمول بلوچ کی شادی کا تبصرہ ایک ٹی وی شو میں آیا، جہاں حالیہ دنوں میں شادی کے بندھن میں بندھنے والی مشہور شخصیات کو مبارک باد دی جارہی تھی۔
ندا یاسر کے مارننگ شو میں سارہ خان اور معروف گلوکار فلک شبیر بطور مہمان شریک ہوئے، جنہوں نے اپنی ذاتی اور پیشہ ورانہ زندگی کے بارے میں گفتگو کی۔ اس دوران، ندا یاسر نے انمول بلوچ کا نام نئی شادی شدہ جوڑوں کی فہرست میں شامل کیا، جس پر فلك شبیر نے انہیں مبارک باد دی۔
اس مبارک باد کے بعد انمول کے مداح تشویش میں مبتلا ہوگئے کہ آیا اداکارہ واقعی شادی کر چکی ہیں جب کہ کچھ رپورٹس میں یہ بھی کہا گیا تھا کہ انمول کی شادی عیدالفطر کے بعد ہوگی۔
ان تمام افواہوں کے بعد اب انمول بلوچ نے انسٹاگرام پر ایک اسٹوری شیئر کرتے ہوئے ان تمام افواہوں کی تردید کردی ہے۔
انسٹاگرام اسٹوری میں انہوں نے واضح کیا کہ ابھی ان کی شادی نہیں ہوئی۔ اداکارہ نے لکھا ’میری ابھی شادی نہیں ہوئی اور جب وقت آئے گا تو میں خود اس خبر کو اپنے مداحوں اور انڈسٹری کے لوگوں کے ساتھ شیئر کروں گی، پیار کیلئے بہت شکریہ‘۔
انمول بلوچ کے اس بیان کی بعد ان کی شادی سے متعلق تمام افواہیں دم توڑ گئی ہیں۔ رپورٹس میں بتایا جارہا تھا کہ انمول بلوچ جلد ہی ایک معروف سیاستدان کے بیٹے سے رشتہ ازدواج میں منسلک ہونے والی ہیں۔