لاہور: معروف گلوکار اور اداکار علی ظفر نے لکس اسٹائل ایوارڈز کی انتظامیہ سے بڑا مطالبہ کرتے ہوئے کہا کہ وہ خواجہ سراؤں کو بھی ایوارڈ سے نوازیں۔
سال کے بہترین گلوکار کا ایوارڈ حاصل کرنے والے گلوکار علی ظفر نے لکس اسٹائل ایوارڈز میں ایوارڈ وصول کرتے وقت سب کا شکریہ ادا کیا، ساتھ ہی انہوں نے خواجہ سراؤں کے لیے بھی آواز اٹھائی۔
انہوں نے کہا کہ ہم اداکار تو نظروں میں آتے رہتے ہیں، ہمیں تو شہرت ملتی رہتی ہے مگر خواجہ سراؤں کو ان کے حقوق دینا، انہیں قبول کرنا بے حد ضروری ہے، میں چاہتا ہوں کہ انہیں بھی اعزاز دیا جائے۔
علی ظفر نے درخواست کی کہ اگلے لکس اسٹائل ایوارڈز میں خواجہ سراؤں کے لیے بھی مخصوص ایوارڈز رکھے جائیں۔
خیال رہے کہ پاکستانی اداکاروں اور فنکاروں کے اعزاز میں لکس اسٹائل ایوارڈز کے 21 ویں ایڈیشن کی رنگا رنگ تقریب لاہور ایکسپو سینٹر میں منعقد ہوئی جس میں بڑی تعداد میں شوبزفنکاروں نے شرکت کی۔