کراچی: پاکستان کے معروف اداکار اور موسیقار اذان سمیع کی اپنے والد، بھارتی فلم انڈسٹری کے گلوکار عدنان سمیع خان کے ساتھ تصویر سوشل میڈیا پر وائرل ہوگئی۔
یہ تصویر عدنان سمیع نے ایک روز قبل فوٹو اینڈ ویڈیو شیئرنگ پلیٹ فارم انسٹاگرام پر شیئر کی تھی، جس میں وہ اپنے بڑے بیٹے اذان سمیع اور بھائی جنید سمیع خان اور دوسری اہلیہ سے اپنی بیٹی مدینہ سمیع خان کے ساتھ خوش گوار موڈ میں نظر آرہے ہیں۔
یہ تصویر مالدیپ کی ہے، جہاں اس خاندان کو چھٹیاں گزارتے اور مالدیپ کے خوبصورت سمندر کا لطف اُٹھاتے دیکھا جاسکتا ہے۔
اس تصویر میں جنید سمیع خان کی موجودگی خاص اہمیت رکھتی ہے کیونکہ گزشتہ سال جنید نے سوشل میڈیا پر ایک پوسٹ کے ذریعے اپنے بھائی عدنان سمیع کے خلاف سخت بیانات دیے تھے۔
انہوں نے عدنان کو ’کینسر‘ قرار دیتے ہوئے انہیں جھوٹا کہا اور ان کی پیدائش کے حوالے سے انکشاف کیا تھا کہ عدنان سمیع خان برطانیہ میں نہیں بلکہ راولپنڈی میں 15 اگست 1969 کو پیدا ہوئے تھے جب کہ ان کی والدہ کا تعلق سرگودھا سے ہے۔
تاہم اب اس تصویر کے سامنے آنے کے بعد لگتا ہے کہ اس خاندان کی رنجشیں دور ہوچکی ہیں۔