کراچی: ٹی وی کی سینئر اداکارہ شگفتہ اعجاز کے بھائی انتقال کرگئے، اداکارہ نے سوشل میڈیا پر بھائی کے انتقال کی خبر مداحوں کے ساتھ شیئر کی۔
اداکارہ شگفتہ اعجاز ایک بار پھر شدید صدمے سے دوچار ہیں، ان کے بھائی کے انتقال کی خبر سامنے آئی ہے۔ شگفتہ اعجاز نے یہ افسوس ناک خبر اپنے مداحوں کے ساتھ سوشل میڈیا کے ذریعے شیئر کی اور مرحوم کے لیے دعا کی درخواست کی۔
خیال رہے کہ گزشتہ برس اداکارہ کے شوہر یحییٰ صدیقی کینسر کے باعث انتقال کر گئے تھے، جس کے بعد انہوں نے چند ماہ کے لیے شوبز اور سوشل میڈیا سے دوری اختیار کرلی تھی۔
شگفتہ اعجاز کے بھائی کے انتقال پر ساتھی اداکار جنید خان، خالد انعم، ژالے سرحدی، لیلیٰ واسطی اور صائمہ قریشی سمیت کئی ساتھی فنکاروں اور مداحوں نے مرحوم کے لیے دعائے مغفرت کی اور ان کے اہلِ خانہ کے لیے صبرِ جمیل کی دعا کی۔