اداکارہ صاحبہ کا سیٹ پر ساتھی اداکار کو تھپڑ مارنے کا انکشاف

لاہور: ٹی وی اور فلموں کی سینئر اداکارہ صاحبہ نے سیٹ پر شوٹنگ کے دوران ساتھی اداکار کو تھپڑ مارا جس سے وہ زمین پر گر گیا۔
نجی ٹی وی شو میں صاحبہ نے بتایا کہ ماضی میں ایک فلم کی شوٹنگ کے دوران انہوں نے ساتھی اداکار کو تھپڑ مار دیا تھا، اداکارہ نے بتایا کہ اس فلم میں فیصل قریشی ان کے ہیرو تھے اور ایک گانے کی شوٹنگ کے دوران انہیں ایک اداکار کے ساتھ ڈانس کرکے فیصل قریشی کو جلانا تھا۔
اداکارہ صاحبہ نے بتایا کہ وہ اداکار حد سے زیادہ اوور ایکٹنگ کررہا تھا اور جب کیمرہ آن ہوا تو اس نے اوور ایکٹنگ کی تو میں نے اسے تھپڑ مار دیا۔ انہوں نے بتایا کہ تھپڑ اتنا زوردار تھا کہ وہ اداکار زمین پر گر گیا۔
صاحبہ نے کہا کہ جس اداکار کو تھپڑ مارا تھا، اس کا نام مجھے یاد نہیں، کیونکہ اس نے بعد میں شوبز انڈسٹری میں کام جاری نہیں رکھا۔
صاحبہ نے مزید کہا کہ اس واقعے کی ویڈیو ممکنہ طور پر فیصل قریشی کے پاس موجود ہے کیونکہ وہ اس وقت ویڈیو بنارہے تھے۔ انہوں نے مزید بتایا کہ آج بھی جب فیصل قریشی سے ملاقات ہوتی ہے تو وہ اس تھپڑ کی گونج کو یاد کرتے ہیں۔