اداکارہ میرا سیٹھی کی ڈھائی سال بعد اپنی طلاق کی تصدیق

لاہور: پی سی بی کے سابق چیئرمین نجم سیٹھی کی بیٹی و اداکارہ میرا سیٹھی نے اپنی طلاق کی تصدیق کردی۔
حال ہی میں دیے گئے ایک انٹرویو میں اداکارہ میرا سیٹھی نے اعتراف کیا کہ مارچ 2023 میں میری طلاق ہوگئی تھی، یہ ڈھائی سال پہلے کی بات ہے، اس دوران میں ایک ڈرامے کی شوٹنگ کررہی تھی، یہ وقت میرے لیے بہت مشکل تھا لیکن میں خوش قسمت تھی کہ مجھے بھرپور تعاون ملا۔
اداکارہ میرا سیٹھی کا کہنا تھا کہ کئی سال قبل میں نے ایک ڈرامہ کیا تھا جس کا ایک ڈائیلاگ مجھے آج بھی یاد ہے، ایک طلاق یافتہ عورت معاشرے کے لیے کانٹا بن جاتی ہے، لیکن درحقیقت اب صورت حال بہت بدل چکی ہے، مجھ سمیت اب کئی اداکارائیں اس موضوع پر کھل کر بات کررہی ہیں۔
میرا سیٹھی نے طلاق کے بعد کے ٹراما کا اعتراف کرتے ہوئے کہا کہ علیحدگی کا عمل کسی بھی عورت کے لیے آسان نہیں ہوتا، طلاق ان سمیت کسی بھی عورت کی زندگی حتیٰ کہ شخصیت پر بھی گہرا اثر مرتب کرتی ہے، میں آج طلاق کے ڈھائی سال بعد بھی اپنا اور دنیا کا تعلق جاننے کے لیے خود میں جھانک رہی ہوں۔
خیال رہے کہ اداکارہ میرا سیٹھی نے نومبر 2019 میں سان فرانسسکو میں اپنے قریبی دوست بلال صدیقی سے سادگی سے شادی کی تھی، جس کی تصاویر سوشل میڈیا پر بے حد وائرل ہوئی تھیں۔
میرا سیٹھی اور بلال صدیقی دونوں ایک ساتھ آکسفورڈ یونیورسٹی میں زیر تعلیم تھے۔