پورا دن فلیٹ میں بے ہوش رہی، اداکارہ عمارہ کا تہلکہ خیز انکشاف

کراچی: اداکارہ عمارہ چوہدری نے اکیلے رہنے کے حوالے سے خوف ناک تجربے سے متعلق بڑا انکشاف کیا ہے
عمارہ چوہدری حال ہی میں نجی ٹی وی کے شو میں شریک ہوئیں، انہوں نے کراچی سمیت ملک کے دیگر شہروں میں تنہا رہنے والے لوگوں کے حوالے سے بات کی۔
عمارہ چوہدری کا کہنا تھا کہ کراچی میں بڑی تعداد میں لڑکے لڑکیاں تنہا رہتے ہیں جس کی کئی وجوہ ہیں۔
عمارہ چوہدری نے کہا کہ کئی لوگ کراچی میں کام کی غرض سے تو کئی پڑھائی کے سلسلے میں مقیم ہیں، لیکن تنہا رہنا آسان نہیں کیوں کہ کئی مواقع ایسے ہوتے ہیں جب انسان کو اپنوں کی کمی شدت سے محسوس ہوتی ہے۔
عمارہ نے مزید کہا کہ میری فیملی لاہور میں رہتی ہے لیکن میں کام کی وجہ سے کراچی میں مقیم ہوں، شوٹ سے واپسی پر تنہائی کا احساس غالب رہتا ہے، خاص طور پر اُس وقت جب آپ بیمار پڑجائیں تو تنہائی، اپنوں سے دوری اور زیادہ محسوس ہونے لگتی ہے۔
کراچی میں تنہا رہنے کے حوالے سے خوف ناک تجربہ شیئر کرتے ہوئے عمارہ نے بتایا کہ 2 سال قبل میں کورونا کا شکار ہوئی تھی، اس وقت شوٹس کے سلسلے میں کراچی میں ہی موجود تھی، لیکن کورونا میں مبتلا ہونے کے بعد مجھے اہل خانہ کی کمی شدت سے محسوس ہوئی۔
انہوں نے مزید بتایا کہ کورونا کا شکار ہونے کے اگلے روز ہی میں پورا دن کیلئے بے ہوش ہوگئی، لیکن کسی کو پتا نہ چلا، مجھ سے رابطہ نہ ہونے پر گھروالوں نے فلیٹ مالک سے رابطہ کرکے میرے حوالے سے بتایا، اس کے بعد فلیٹ مالک نے کسی کو میرے فلیٹ بھیج کر میری خیریت دریافت کرنا چاہی، اسی دوران دروازہ کھٹکھٹانے پر میں ہوش میں آئی۔
عمارہ کا کہنا تھا کہ پورا دن بے ہوش رہنے کے بعد جب میری آنکھ کھلی تو میرے موبائل پر گھر سے ڈھیروں کالز آئی ہوئی تھیں حتیٰ کہ میرے اہل خانہ کراچی آنے کیلئے ٹکٹ بک کرواچکے تھے جب کہ فلیٹ مالک نے بتایا کہ میرا دروازہ اب بھی میرے گھر والوں کے کہنے پر کھٹکھٹایا گیا، اس سے قبل تو فلیٹ مالک بھی یہی سمجھتا رہا کہ میں لاہور چلی گئی ہوں۔