اداکار عماد عرفانی کی علامہ اقبال کے خاندان کیساتھ نسبت کا انکشاف

کراچی: ٹی وی کے معروف اداکار عماد عرفانی نے انکشاف کیا ہے کہ ان کی شاعر مشرق علامہ اقبال کے خاندان سے نسبت ہے۔
اداکار عماد عرفانی نے مہوش حیات سمیت دیگر فنکاروں کے ساتھ پی ٹی وی کے پروگرام Virsa Heritage Revived میں شرکت کی، پروگرام میں میزبانی کے فرائض اداکارہ سونیا حسین اور میاں صلاح الدین نے سرانجام دیے۔
عماد عرفانی کا دوران شو کہنا تھا کہ شاید یہ بات لوگ نہ جانتے ہوں کہ میری میاں صلاح الدین سے رشتے داری بھی ہے، ٹیلی وژن کی جانی مانی شخصیت صلاح الدین یوسف علامہ اقبال کے نواسے ہیں۔
عماد عرفانی کی بات پر میزبان صلاح الدین یوسف نے وضاحت دی کہ آپ کا علامہ اقبال سے رشتہ میں بتاؤں گا، عماد عرفانی کی پردادی علامہ صاحب کی بہن تھیں۔
عماد عرفانی کا کہنا تھا کہ یہ میری کسی سرکاری پروگرام میں پہلی مرتبہ شرکت ہے لیکن یہاں آکر میں نے خوبصورتی کو جانا، یہ تجربہ میرے لیے بے حد خوبصورت رہا۔