اداکار گوہر رشید نے نکاح کرلیا؟ ویڈیو وائرل

کراچی: پاکستان سے تعلق رکھنے والے اداکار گوہر رشید کی نکاح کی ویڈیو منظرعام پر آگئی۔
سوشل میڈیا پر وائرل ویڈیو میں اداکار کو نکاح خواں کے سامنے دستاویزات پر دستخط کرتے دیکھا جاسکتا ہے جب کہ اس موقع پر ہدایت کار بلال لاشاری اور اداکار حمزہ علی عباسی بھی ان کے ساتھ موجود ہیں۔
یہ ویڈیو ایسے وقت میں سامنے آئی ہے جب گوہر رشید کی ان کی قریبی دوست اداکارہ کبریٰ خان کے ساتھ شادی کی افواہیں گرم ہیں۔
سوشل میڈیا پر پھیلی افواہوں میں یہ دعویٰ کیا گیا تھا کہ گوہر رشید اور کبریٰ خان فروری تک شادی کے بندھن میں بندھ جائیں گے۔
علاوہ ازیں گوہر رشید نے اپنے آفیشل انسٹاگرام اکاؤنٹ پر کچھ ڈانس پریکٹس کی ویڈیوز بھی شیئر کی تھیں، جن میں شوبز سے تعلق رکھنے والی شخصیات ایک جگہ جمع نظر آرہے تھے جن میں کبریٰ خان بھی شامل تھیں۔
ان ویڈیوز کے ساتھ اداکار نے میرے یار کی شادی جیسے ہیش ٹیگز استعمال کیے، جس نے مداحوں کو قیاس آرائیوں پر مجبور کردیا۔
نئی ویڈیو میں گوہر رشید نکاح خواں کی ہدایات پر دستاویزات پر دستخط کرتے نظر آرہے ہیں، تاہم یہ واضح نہیں ہوسکا کہ یہ ویڈیو گوہر رشید کی اپنی شادی سے متعلق ہے یا کسی اور تقریب کا حصہ۔
خیال رہے کہ گوہر رشید اور کبریٰ خان کی شادی کی خبروں پر دونوں کی جانب سے تاحال تصدیق یا تردید نہیں کی گئی ہے۔